കോവിഡ് രോഗികളുടെ വിവരങ്ങൾ ഗൂഗിളിൽ; കണ്ണൂർ ജില്ലാ കലക്ടർ ചീഫ് സെക്രട്ടറി റിപ്പോർട്ട് നൽകി

കോവിഡ് ബാധിച്ചവരെയും ക്വാറന്റീനിൽ ഉള്ളവരെയും സംബന്ധിച്ച വിവരങ്ങളാണ് ഗൂഗിളിൽ ലഭ്യമായത്. ആരോഗ്യവകുപ്പ് ശേഖരിച്ച വിവരങ്ങളുടെ അടിസ്ഥാനത്തിൽ പോലീസ് തയ്യാറാക്കിയ ആപ്പിൽ നിന്നാണ് വിവരങ്ങൾ ചേർന്നത്. ട്രിപ്പിൾ ലോക്ക് ഡൗൺ നടപ്പിലാക്കുന്നതിന്റെ ഭാഗമായാണ് ഇത്തരമൊരു ആപ്പ് പോലീസ് പരീക്ഷിച്ചത്.

കോവിഡ് രോഗബാധിതർ, സമ്പർക്ക പട്ടികയിലുള്ളവർ, തീവ്ര ബാധിത പ്രദേശങ്ങൾ എന്നീ വിശദാംശങ്ങൾ രേഖപ്പെടുത്തിയ ഭൂപടമാണ് പുറത്തായത്. ഇതിൽ വ്യക്തികളുടെ പേരും വിലാസവും ഫോൺ നമ്പറും ലഭ്യമാണ്. രോഗമുക്തി നേടിയവർക്ക് വിവിധ സ്വകാര്യ കേന്ദ്രങ്ങളിൽ നിന്ന് ഫോൺ കോൾ വന്നതോടെയാണ് സംഭവം പുറത്തായത്. മുഖ്യമന്ത്രിക്ക് പരാതി നൽകാനാണ് രോഗബാധിതരായിരുന്നവരുടെ നീക്കം.

കോവിഡ് ഡാറ്റാ സംരക്ഷണത്തെപ്പറ്റി രാഷ്ട്രീയ വിവാദം സംസ്ഥാനത്ത് തുടരുമ്പോഴാണ് വിവരങ്ങൾ ഗൂഗിൾ ലഭ്യമാകുന്നത്. രോഗികളെയും സമ്പർക്ക പട്ടികയിലുള്ള വരെയും സംബന്ധിച്ചുള്ള വിവരങ്ങൾ കൈകാര്യം ചെയ്യുന്നതിൽ വേണ്ടത്ര ജാഗ്രത അത് പാലിച്ചില്ലെന്ന് വസ്തുതയിലേക്കാണ് സംഭവങ്ങൾ വിരൽ ചൂണ്ടുന്നത്.