മലപ്പുറത്ത് കോടതി പരിസരത്ത് വച്ച് ഭാര്യയെ പെട്രോൾ ഒഴിച്ച് കത്തിക്കാൻ ശ്രമം; ഭർത്താവ് പോലീസ് പിടിയിൽ

ഉച്ചയ്ക്ക് ഒരു മണിയോടെയാണ് സംഭവം. മൻസൂറിന്റെയും റുബീനയുടെയും വിവാഹമോചന നടപടികൾ മലപ്പുറം കുടുംബ കോടതിയിൽ പൂർത്തിയാവുകയാണ്. കൗൺസിലിങ്ങിന് വേണ്ടി ഇരുവരെയും കോടതി വിളിപ്പിച്ചിരുന്നു. കോടതിയിൽ നിന്നിറങ്ങിയ റുബീനയെ തീ കൊളുത്തിക്കൊല്ലാൻ പെട്രോളുമായി മൻസൂർ പിറകെ ഓടി. അഭിഭാഷകരും മറ്റുള്ളവരും മൻസൂറിനെ പിടിച്ചു മാറ്റുകയായിരുന്നു.

“കോടതിയിൽ നിന്നും ഒരു കുപ്പിയിൽ പെട്രോളുമായി എൻ്റെ പിന്നാലെ ഓടുകയായിരുന്നു. കുപ്പി ഞാൻ തുറക്കാൻ സമ്മതിക്കാതെ മുറുക്കെ പിടിച്ചു. അപ്പോഴേക്കും ആളുകൾ കൂടി കുപ്പി പിടിച്ച് വാങ്ങി വലിച്ചെറിഞ്ഞു. ഒരു വിധമാണ് രക്ഷപ്പെട്ടത്,” റുബീന പറയുന്നു.

മുൻപും പലവട്ടം മൻസൂർ തന്നെ അപായപ്പെടുത്താൻ ശ്രമിച്ചിട്ടുണ്ട് എന്ന് റുബീന പറഞ്ഞു. “ഇത് ആദ്യമായല്ല… ഗ്യാസ് തുറന്ന് വിട്ടും, ഷവറിൻ്റെ പൈപ്പിൽ കുരുക്കിട്ടും ഒക്കെ എന്നെ കൊല്ലാൻ നോക്കിയിട്ടുണ്ട്. മേലാറ്റൂർ പോലീസിന് പരാതിയും മുൻപ് കൊടുത്തിട്ടുണ്ട്.”

കൊലപാതകശ്രമത്തിനാണ് മൻസൂറിനെതിരെ കേസെടുത്തിരിക്കുന്നത് എന്ന് മലപ്പുറം പോലീസ് പറഞ്ഞു. കോടതിയിൽ ഹാജരാക്കിയ മൻസൂറിനെ റിമാൻഡ് ചെയ്തു.