ഇത് പൊളിക്കും ! ടർബോ ജോസായി മമ്മൂട്ടി; വൈശാഖ് ചിത്രം 'ടർബോ' ഫസ്റ്റ് ലുക്ക് പോസ്റ്റര്‍

'കണ്ണൂർ സ്‌ക്വാഡ്'ന്റെയും 'കാതൽ ദി കോർ'ന്റെയും വൻ വിജയത്തിന് പിന്നാലെ മമ്മൂട്ടി കമ്പനിയുടെ ബാനറിൽ എത്തുന്ന 'ടർബോ'യുടെ ഫസ്റ്റ് ലുക്ക് റിലീസായി. കറുപ്പ് ഷർട്ടും മുണ്ടും ഉടുത്ത് കഴുത്തിലൊരു കുരിശു മാലയുമായ് നിൽക്കുന്ന മമ്മൂട്ടിയെയാണ് പോസ്റ്ററിൽ കാണുന്നത്. പിറകിൽ ഒരു കൂട്ടം ആളുകൾ ഓടി വരുന്നതായും കാണാം. ഉഗ്രനൊരു അടിക്ക് മുന്‍പുള്ള രംഗമാണിതെന്ന സൂചനയാണ് പോസ്റ്റർ നൽകുന്നത്. മമ്മൂട്ടി ടര്‍ബോ ജോസ് എന്ന കഥാപാത്രമായെത്തുന്ന ഈ മാസ്സ് ആക്ഷൻ  ചിത്രം സംവിധാനം ചെയ്യുന്നത് വൈശാഖാണ്. മിഥുൻ മാനുവൽ തോമസിന്റെതാണ് തിരക്കഥ. മമ്മൂട്ടി കമ്പനിയുടെ ബാനറിൽ നിർമ്മിക്കുന്ന അഞ്ചാമത്തെ സിനിമയാണ് 'ടർബോ'.