'മധുര പളനി യാത്രകൾ ഇനി എളുപ്പം' കൊല്ലം-കോയമ്പത്തൂർ പുതിയ ട്രെയിൻ വരുന്നു: റൂട്ട് ഇങ്ങനെ

കേരളത്തിൽ റെയിൽവേ യാത്രാ സൗകര്യങ്ങൾ വർധിപ്പിക്കുന്നതിൻ്റെ ഭാഗമായി, കൊല്ലം മുതൽ കോയമ്പത്തൂർ വരെ പുതിയ ട്രെയിൻ സർവീസിന് വഴിയൊരുങ്ങുകയാണ്. കേന്ദ്ര റെയിൽവേ മന്ത്രി അശ്വിനി വൈഷ്ണവ് ഈ ആവശ്യം പരിഗണനയിലാണെന്ന് സ്ഥിരീകരിച്ചതോടെ, ഈ റൂട്ടിലെ യാത്രക്കാർക്ക് വലിയ പ്രതീക്ഷയാണ് ഉയർന്നിരിക്കുന്നത്. കൊല്ലത്ത് നിന്ന് ആരംഭിച്ച് പുനലൂർ, മധുരൈ, പളനി എന്നിവിടങ്ങളിലൂടെ കോയമ്പത്തൂരിലേക്ക് ഈ ട്രെയിൻ സർവീസ് നടത്താനാണ് റെയിൽവേയുടെ പദ്ധതി. തിരുവനന്തപുരം റെയിൽവേ ഡിവിഷൻ്റെ കീഴിൽ നടന്ന എംപിമാരുടെ യോഗത്തിൽ, മാവേലിക്കര എംപി കൊടിക്കുന്നിൽ സുരേഷ് ഈ ട്രെയിൻ സർവീസിൻ്റെ ആവശ്യകത ശക്തമായി ഉന്നയിച്ചിരുന്നു. തുടർന്ന്, കേന്ദ്ര റെയിൽവേ മന്ത്രി അശ്വിനി വൈഷ്ണവിന് അദ്ദേഹം ഒരു കത്ത് നൽകുകയും, ഈ ആവശ്യം ഗൗരവമായി പരിഗണിക്കുമെന്ന് മന്ത്രി മറുപടി നൽകുകയും ചെയ്തു. ഈ മറുപടിയിൽ, കൊല്ലം-പളനി-കോയമ്പത്തൂർ റൂട്ടിൽ പുതിയ ട്രെയിൻ സർവീസ് ആരംഭിക്കുന്നതിന് വിശദമായ പരിശോധന നടത്താൻ ബന്ധപ്പെട്ട ഉദ്യോഗസ്ഥർക്ക് നിർദേശം നൽകിയിട്ടുണ്ടെന്നും മന്ത്രി വ്യക്തമാക്കി.