കോഴിക്കോട് 28 പട്ടികജാതി നഗരങ്ങളിൽ അംബേദ്കർ ഗ്രാമം പദ്ധതി പൂര്‍ത്തിയായി

റോഡ് വികസനം, ആശയ വിനിമയ സൗകര്യം, കുടിവെള്ള സൗകര്യങ്ങൾ, അഴുക്കുചാല് സൗകര്യങ്ങൾ, വൈദ്യുതീകരണം, സോളാർ തെരുവു വിളക്ക്, സാനിറ്റേഷൻ, ഭവന പുനരുദ്ധാരണം എന്നിങ്ങനെ വിവിധ പദ്ധതികളാണ് അംബേദ്കർ ഗ്രാമവികസന പരിപാടിയിൽ ഉൾപ്പെടുന്നത്. പട്ടികജാതി-വർഗ വിഭാഗത്തിൽപ്പെട്ട ജനങ്ങളുടെ സമഗ്ര വികസനം പദ്ധതിയിലൂടെ സാധ്യമായതായി ജില്ലാ പട്ടികജാതി വികസന ഓഫീസർ ഐ പി ശൈലേഷ് പറഞ്ഞു.

പദ്ധതി പൂർണമായ 28 നഗരങ്ങൾക്ക് പുറമെ 21 നഗരങ്ങളുടെ പ്രവൃത്തി പുരോഗമിക്കുകയാണ്. ഇതിൽ ആറെണ്ണത്തിൻ്റെ പ്രവൃത്തി അവസാന ഘട്ടത്തിലാണ്. അഞ്ച് പദ്ധതികളുടെ പ്രാരംഭ നടപടികൾ ആരംഭിച്ചു. 2016-17 വർഷത്തിലാണ് അംബേദ്കർ ഗ്രാമ വികസന പദ്ധതി കോഴിക്കോട് ആരംഭിച്ചത്. ആദ്യഘട്ടത്തിൽ 40 കുടുംബങ്ങൾ താമസിക്കുന്ന പട്ടികജാതി നഗരങ്ങളിൽ ആണ് പദ്ധതി വിഭാവനം ചെയ്തത്. പിന്നീട് 25 കുടുംബങ്ങളുള്ള നഗരങ്ങളെ കൂടി ഉൾപ്പെടുത്തുകയായിരുന്നു.