മണ്ണോ വെള്ളമോ ഇല്ലാതെ കുങ്കമപ്പൂ കൃഷി ചെയ്ത ദമ്പതികള്‍ പ്രതിവര്‍ഷം സമ്പാദിക്കുന്നത് അരക്കോടി രൂപ

ജമ്മു കശ്മീരിലെ തണുപ്പേറിയ കാലാവസ്ഥയില്‍ കൃഷി ചെയ്‌തെടുക്കുന്ന കുങ്കുമപ്പൂവ് ലോക പ്രശസ്തമാണ്. ലോകത്തിലെ തന്നെ ഏറ്റവും വിലയേറിയ സുഗന്ധദ്രവ്യങ്ങളിലൊന്നായ കുങ്കുമപ്പൂവ് കൃഷി ചെയ്ത് അരക്കോടിയോളം രൂപയുടെ പ്രതിവര്‍ഷ വരുമാനമുണ്ടാക്കുകയാണ് നാഗ്പൂരില്‍ നിന്നുള്ള ഈ ദമ്പതിമാര്‍. അക്ഷയ് ഹോലെ, ദിവ്യ ലോഹാകാരെ എന്നിവരാണ് സാങ്കേതികവിദ്യ പ്രയോജനപ്പെടുത്തി മികച്ച വരുമാനമുണ്ടാക്കുന്നത്. നാഗ്പൂരിലെ ചൂടേറിയ കാലാവസ്ഥയില്‍ കുങ്കുമപ്പൂവ് കൃഷി അസാധ്യമാണ്. അതിനാല്‍ എയറോപോണിക്‌സ് എന്ന സാങ്കേതിവിദ്യ ഉപയോഗിച്ചാണ് ഇവര്‍ കൃഷി ചെയ്യുന്നത്. 400 ചതുരശ്ര അടി മാത്രം വലുപ്പമുള്ള ചെറിയൊരു മുറിയിലാണ് കുങ്കുമപ്പൂവ് കൃഷി. മുറിയ്ക്കുള്ളില്‍ തണുപ്പും, ഈര്‍പ്പം നിറഞ്ഞതുമായ അന്തരീക്ഷം കൃത്രിമമായി സൃഷ്ടിക്കുകയാണ് ഇവര്‍ ചെയ്യുന്നത്. ബിബിഎ ബിരുദധാരിയായ അക്ഷയ് ബാങ്ക് ഉദ്യോഗസ്ഥയായ ദിവ്യയോടൊപ്പം ചേര്‍ന്ന് 2020ലാണ് കുങ്കുമകൃഷിയിലേക്ക് ഇറങ്ങുന്നത്. കുങ്കുമപ്പൂവിന് കൂടിയ അളവില്‍ ആവശ്യക്കാര്‍ ഉണ്ടെങ്കിലും വളരെ കുറച്ചുമാത്രമാണ് ഇന്ത്യയില്‍ കൃഷി ചെയ്യുന്നത്.