കാക്കിക്കുള്ളിലൊരു ബോഡി ബിൽഡർ; മിസ്റ്റർ ഇന്ത്യ പൊലീസ് കേരളത്തിൽനിന്ന് ആദ്യം; അടുത്ത ലക്ഷ്യം മിസ്റ്റർ വേൾഡ് പൊലീസ്

തിരുവനന്തപുരത്തിന്റെ തീരദേശഗ്രാമമായ കാഞ്ഞിരംകുളത്തുനിന്നാണ് റോജിയുടെ കഥ ആരംഭിക്കുന്നത്. അതിസാധാരണമായ കുടുംബം. കൗമാരത്തിലെത്തിയപ്പോഴെ ബോഡിബിൽഡിംഗ് ഹരമായി മനസിൽ ഇടം പിടിച്ചു. പക്ഷേ, പ്രതിസന്ധികൾ എന്നും വഴിമുടക്കി. ബോഡി ബിൽഡിംഗ് അല്ലാതെ മറ്റു വലിയ സ്വപ്നങ്ങളൊന്നുമുണ്ടായിരുന്നില്ല. പഠനം കഴിഞ്ഞ് പൊലീസ് കാക്കിയിട്ടപ്പോഴാണ് ആഗ്രഹത്തിന് വീണ്ടും ജീവൻ വച്ചത്.

കേരള പൊലീസിൽ ടെലികമ്യൂണിക്കേഷൻ വിഭാഗത്തിലാണ് റോജിയുടെ സേവനം. സാധാരണ പൊലീസ് ഉദ്യോഗസ്ഥനായി എട്ടുവർഷത്തോളം വയർലെസ് റൂമിൽ കഴിഞ്ഞപ്പോഴാണ് റോജി കുട്ടിക്കാലത്തെ സ്വപ്നം പൊടി തട്ടിയെടുത്തത്. കാര്യമറിഞ്ഞപ്പോൾ കൂടെയുള്ള പൊലീസുകാർക്കും കുടുംബത്തിനും മൊത്തം സമ്മതം. അവരുടെ പൂർണ പിന്തുണ കൂടിയായപ്പോൾ സ്വപ്നം പിടിച്ചുകെട്ടാൻ റോജിക്ക് വേറൊന്നും ചിന്തിക്കേണ്ടിവന്നില്ല.

ബോഡി ബിൽഡിംഗിനെ ഒരു കായിക ഇനമായി കണക്കിലെടുത്തിട്ടില്ലാത്തതിനാൽ ജോലിക്കൊപ്പം സമയം കണ്ടെത്തി വേണം പരിശീലനം നടത്താൻ. ദിവസവും രാവിലെയും വൈകിട്ടും മൂന്നു മണിക്കൂർ വീതമാണ് പരിശീലനം. സ്കൂളിൽ റോജിക്കൊപ്പം പഠിച്ച ജെ പി പ്രദീപാണ് പരിശീലകൻ. പരിശീലകന് പുറമേ റോജിയുടെ ഉറ്റചങ്ങാതിയുമാണ് പ്രദീപ്. ബോഡി ഫിറ്റ്നെസിനു വേണ്ടി ചെറിയ രീതിയിൽ പരിശീലനം നടത്തിയിരുന്ന റോജിയെ മത്സരത്തിൽ പങ്കെടുക്കുന്ന നിലയിലേക്കു കൊണ്ടുവന്നത് പ്രദീപാണ്. നിരവധി കുട്ടികൾ പ്രദീപിന്റെ ശിക്ഷണത്തിലുണ്ട്.

നിരവധി സുഹൃത്തുക്കളുടെ പിന്തുണയാലാണ് ഇതുവരെ എത്തിയത്. പക്ഷേ, അവരും റോജിയെപ്പോലെ സാധാരണക്കാർ മാത്രം. പലർക്കും അന്നത്തെ നിത്യച്ചെലവിനുള്ള പണം കണ്ടെത്താനാവുന്ന ജോലികളുള്ളവർ. അവർ അതിൽനിന്നു മിച്ചം പിടിച്ചാണ് റോജിയെ സഹായിക്കുന്നത്. വലിയ വലിയ മത്സരങ്ങളിൽ പങ്കെടുക്കാൻ സാമ്പത്തികം ഒരു തടസമായി നിൽക്കുകയാണ്. അതിനുള്ള പരിഹാരമാണ് റോജി ഇപ്പോൾ തേടുന്നത്.