'100 സി​ഗരറ്റ് വരെ ഒരു ദിവസം'; ഷാരൂഖ് ഖാന്‍ പുകവലി നിർത്തിയതിന് കാരണം

ഇന്ത്യയിൽ ഒട്ടനവധി ആരാധകരുള്ള ബോളിവുഡ് സൂപ്പർ താരമാണ് കിംഗ് ഖാൻ .നവംബർ രണ്ടിന് താരത്തിന്റെ അൻപത്തിഒൻപതാം ജന്മദിനം ആയിരുന്നു.താരത്തിന്റെ ജന്മദിനം ആഘോഷിക്കുന്നതിന്റെ ഭാ​ഗമായി നടന്ന മീറ്റ് ആൻഡ് ഗ്രീറ്റിനിടെ താന്‍ ജീവിതത്തിലെടുത്ത പുതിയ ഒരു തീരുമാനത്തെ കുറിച്ച് ഷാരൂഖ് ഖാന്‍ വെളിപ്പെടുത്തി.തന്റെ സി​ഗരറ്റ് വലിക്കുന്ന ശീലം ഉപേക്ഷിച്ചതായി ഷാരൂഖ് ഖാൻ പറഞ്ഞു .നേരത്തെ തന്നെ തന്റെ പുകവലി ശീലങ്ങളെ കുറിച്ച് തുറന്നുപറഞ്ഞിട്ടുള്ള വ്യക്തി കൂടിയാണ് താരം .

വര്‍ഷങ്ങളായി പുകവലി ശീലമാക്കിയ വ്യക്തിയാണ് ഷാരൂഖ് ഖാന്‍.ദിവസവും നൂറോളം സിഗരറ്റും മുപ്പതിലേറെ കാപ്പിയും കുടിച്ചിരുന്നുവെന്നാണ് ഒരു അഭിമുഖത്തില്‍ വെച്ച് ഷാരൂഖ് തന്നെ വെളിപ്പെടുത്തിയത്. ഇതു കാരണം ശരിയായി ഭക്ഷണം കഴിക്കാനും വെള്ളം കുടിക്കാനും വരെ മറന്നു പോകാറുണ്ടെന്നും അദ്ദേഹം പറഞ്ഞിരുന്നു.

എന്നാലിപ്പോള്‍ പുകവലി പൂര്‍ണമായി ഉപേക്ഷിച്ചിരിക്കുകയാണെന്നും ശ്വാസസംബന്ധമായ പ്രശ്‌നങ്ങള്‍ ഇതോടെ മാറുമെന്നാണ് പ്രതീക്ഷിക്കുന്നതെന്നും പറഞ്ഞിരിക്കുകയാണ് താരം.

'ഒരു നല്ല കാര്യം പറയാനുണ്ട്. ഞാനിപ്പോള്‍ പുകവലിക്കുന്നില്ല. പുകവലി ഉപേക്ഷിച്ചാല്‍ ശ്വാസമെടുക്കുന്നതിലെ ബുദ്ധിമുട്ട് ഉടന്‍ മാറുമെന്നാണ് കരുതിയത്. പക്ഷെ അത് പൂര്‍ണമായും മാറിയിട്ടില്ല. ഇന്‍ഷാ അള്ളാ, അതും പെട്ടെന്ന് തന്നെ ശരിയാകുമെന്ന് കരുതാം,' ഷാരൂഖ് ഖാന്‍ കൂട്ടിച്ചേർത്തു.

നിറഞ്ഞ കൈയടികളോടെയാണ്‌ നടന്റെ വാക്കുകളെ ആരാധകവൃന്ദം ഏറ്റെടുത്തത്. ഷാരൂഖ് ഖാന്‍ സംസാരിക്കുന്നതിന്റെയും ജനങ്ങള്‍ ആരവം മുഴക്കുന്നതിന്റെയും വീഡിയോ സമൂഹമാധ്യമങ്ങളില്‍ ട്രെന്‍ഡായി കഴിഞ്ഞു.