ആരാധകൻ അയച്ച ഭക്ഷണം സ്വീകരിക്കാൻ തയ്യാറായില്ല; BTS താരം ജങ്കൂക്കിന് വധഭീഷണി!

ദിവസങ്ങൾക്കു മുമ്പാണ് ബിടിഎസ് താരം ജങ്കൂക്കിന്റെ വീട്ടിൽ ആരാധകർ ഭക്ഷണം അയക്കുന്നുവെന്ന വാർത്ത വന്നത്.

ഇത് പതിവായതതോടെ തനിക്ക് ഇനി ആരും ഭക്ഷണം അയക്കരുതെന്നും ആവശ്യത്തിന് ഭക്ഷണം താൻ കഴിക്കുന്നുണ്ടെന്നും വ്യക്തമാക്കി ജങ്കൂക്ക് രംഗത്തെത്തിയിരുന്നു.

തന്റെ അഭ്യർത്ഥന പരിഗണിക്കാതെ ഭക്ഷണം അയക്കുന്നത് തുടർന്നാൽ കടുത്ത നടപടികൾ സ്വീകരിക്കുമെന്നും ബിടിഎസ് താരം മുന്നറിയിപ്പ് നൽകിയിരുന്നു. ഇതിനു പിന്നാലെയാണ് താരത്തിന് വധഭീഷണിയും എത്തിയിരിക്കുന്നത്.

താരത്തിന്റെ ആരാധകരിൽ ഒരാളാണ് വീട്ടിലേക്ക് ഭക്ഷണങ്ങൾ അയച്ചു കൊണ്ടിരുന്നത് എന്നാണ് അറിയുന്നത്. ഭക്ഷണം ജങ്കൂക്ക് നിരാകരിച്ചതോടെയാണ് വധഭീഷണിയുമായി ഇപ്പോൾ എത്തിയിരിക്കുന്നത്.

ജങ്കൂക്ക് എവിടെയാണ് താമസിക്കുന്നത് എന്ന് തനിക്ക് അറിയാമെന്നും വീട്ടിലേക്ക് ഭക്ഷണം അയച്ചെങ്കിൽ അദ്ദേഹത്തെ വധിക്കാനും തനിക്ക് കഴിയുമെന്നുമാണ് ഓൺലൈനിൽ വന്ന ഭീഷണിയിൽ പറയുന്നത്.

ആരാണ് ഇതിനു പിന്നിലെന്ന് വ്യക്തമല്ല. ജങ്കൂക്കിന്റെ വീട് തന്റെ വീടിന് അടുത്താണെന്നും സന്ദേശത്തിൽ പറയുന്നു. താൻ സ്നേഹത്തോടെ അയച്ച ഭക്ഷണം വേണ്ടെന്നു പറഞ്ഞ ജങ്കൂക്ക് അഹങ്കാരിയാണെന്നും സന്ദേശത്തിൽ പറയുന്നു.

പ്രിയതാരത്തിന് വധഭീഷണി വന്നതോടെ ആർമിയും ആശങ്കയിലാണ്. ജങ്കൂക്കിനെ സംരക്ഷിക്കാൻ ഉടൻ നടപടിയെടുക്കണമെന്നും സുരക്ഷ ഉറപ്പാക്കണമെന്നുമാണ് ലോകം മുഴുവനുമുള്ള ആർമി ആവശ്യപ്പെടുന്നത്.

ജങ്കൂക്കിന്റെ മേൽവിലാസം അറിയുന്ന ആരോ ആണ് ഇതിനു പിന്നിലെന്നും ആരായാലും ഉടൻ നടപടിയെടുക്കണമെന്നുമാണ് ആരാധകർ താരത്തിന്റെ ഏജൻസിയായ ഹൈബിനോട് ആവശ്യപ്പെടുന്നത്.

അതേസമയം, ബിടിഎസ് താരങ്ങൾക്കു നേരെ ഇതാദ്യമായല്ല വധഭീഷണി ഉയരുന്നത്. കഴിഞ്ഞ വർഷം ബാൻഡിലെ മറ്റ് രണ്ട് അംഗങ്ങളായ ജിമിൻ, വി എന്നിവർക്കു നേരേയും വധഭീഷണിയുണ്ടായിരുന്നു.