Dileep | മീനാക്ഷിയെ ഇപ്പോൾ സ്വന്തം പെങ്ങളാക്കിയിരിക്കുന്നു എന്ന് ദിലീപ്; രസകരമായ ആ വിശേഷണത്തിന് പിന്നിൽ

രണ്ടു പെൺമക്കളുടെ അച്ഛൻ എന്ന ഉത്തരവാദിത്തമുണ്ട് നടൻ ദിലീപിന് (Actor Dileep). മൂത്തമകൾ മീനാക്ഷി (Meenakshi Dileep) എം.ബി.ബി.എസ്. പഠിച്ച്‌ ഡോക്ടർ ആയെങ്കിൽ, ഇളയ ആളായ മഹാലക്ഷ്മി ഇനിയും ഒന്നാം ക്‌ളാസിൽ പോലും ആയിട്ടില്ല എന്നതാണ് വിശേഷം. അനുജത്തിയെ മകളെപ്പോലെ എടുത്തുകൊണ്ടു നടക്കുന്ന കുട്ടിയാണ് മീനാക്ഷി. ചേച്ചിയെ കണ്ടാൽ മാമാട്ടി എന്ന മഹാലക്ഷ്മി അപ്പോൾ വിരലിൽ തൂങ്ങും

മക്കൾ രണ്ടും തമ്മിലെ പ്രായവ്യത്യാസം ഒരു വിഷയമാണോ എന്ന ചോദ്യം മുൻപൊരിക്കൽ ദിലീപ് നേരിട്ടിട്ടുണ്ട്. എന്നിരുന്നാലും മഹാലക്ഷ്മിയും മീനാക്ഷിയും തമ്മിലെ കുട്ടിക്കാലത്തെ മുഖസാദൃശ്യം മുതൽ അവർ തമ്മിലെ സ്നേഹത്തിനു വരെ യാതൊരു കുറവും സംഭവിച്ചിട്ടില്ല എന്ന് ദിലീപ്. ഇപ്പോൾ മീനാക്ഷി ദിലീപിന്റെ 'പെങ്ങൾ' ആയ രസകരമായ സംഭവവും ദിലീപ് വിവരിക്കുന്നു (തുടർന്ന് വായിക്കുക)

അടുത്തകാലത്ത് റിലീസ് ചെയ്ത 'ബാന്ദ്ര' എന്ന സിനിമയുടെ ഭാഗമായി സംസാരിച്ച ദിലീപിന്റെ ആ വീഡിയോ വൈറലായി മാറിയിരിക്കുന്നു. നായിക തമന്ന ഭാട്ടിയ അടുത്തിരിക്കുമ്പോഴാണ് ദിലീപ് അക്കാര്യം എടുത്തിട്ടത്

തമന്നയുടെ കൂടെ അഭിനയിക്കുമ്പോൾ പ്രായം അൽപ്പം കുറഞ്ഞിരുന്നെങ്കിൽ എന്ന് ചിന്തിച്ചിരുന്നോ എന്ന് അവതാരകയുടെ ചോദ്യം. ഇതേ നായികയുടെ ഒപ്പം ഡാൻസ് ചെയ്യുന്ന വേളയിലാണ് 'അച്ഛൻ ഡാൻസ് ചെയ്ത് നാണംകെടുത്തരുത്' എന്ന് മകൾ മീനാക്ഷി ട്രോളിയതും

'എനിക്കെന്തിനാ പ്രായത്തിനു കുറവ്? ഞാൻ കോളേജിൽ നിന്നും മേലോട്ട് പോയിട്ടില്ലല്ലോ. പ്രായം മനസിലാണ്. മനസ് കൊണ്ട് ഞാൻ മഹാരാജാസിൽ നിന്നും എങ്ങോട്ടും പോയിട്ടില്ല. ചിരിയും കളിയും ബഹളവുമായി ഇപ്പോഴും അങ്ങനെ തന്നെയാണ് പൊയ്ക്കൊണ്ടിരിക്കുന്നത്...

മൂത്ത മോളെ ഞാൻ പെങ്ങളാക്കിയിരിക്കുകയാണ്. ഇളയ മകൾ ഇപ്പോൾ മോളാണ്. കുറച്ചു കൂടി വളരുമ്പോൾ അവളും സിസ്റ്റർ ആവും,' എന്ന് ദിലീപ് തമാശരൂപേണ മറുപടി നൽകി

മീനൂട്ടി ഡോക്ടർ മീനാക്ഷിയാവുക എന്നത് തന്റെ സ്വപ്നമായിരുന്നു എന്ന് ദിലീപ്. എന്ത് പഠിക്കണം, ഏതു വഴിയിൽ പോകണം എന്ന കാര്യം തനിക്കറിയാമായിരുന്നില്ല, മകളോട് പഠിക്കാൻ ആവശ്യമായതെല്ലാം ചോദിയ്ക്കാൻ പറഞ്ഞത് മാത്രമേ ചെയ്തിട്ടുള്ളൂ എന്ന് ദിലീപ്. അച്ഛന്റെ സ്വപ്നം മീനാക്ഷി ഭംഗിയായി നിറവേറ്റുകയും ചെയ്‌തു

യു.കെ.ജി. വിദ്യാർത്ഥിനിയായ മഹാലക്ഷ്മി പക്ഷേ അച്ഛന്റെയും അമ്മയുടെയും അഭിനയ വഴിയോട് ഇപ്പോഴേ ചായ്‌വ് പ്രകടിപ്പിച്ചു കഴിഞ്ഞു. കണ്ണുതെറ്റിയാൽ ഫോൺ എടുത്ത് ക്യാമറ ഓൺ ആക്കി വ്ലോഗ് ചെയ്യലാണത്രേ വ്ലോഗർ 'മഹാ'യുടെ സ്ഥിരം പരിപാടി. മകളുടെ മേൽ ഒരു കണ്ണ് വേണം എന്ന് ദിലീപ് ഭാര്യ കാവ്യാ മാധവനോട് ഒരു താക്കീതും കൊടുത്തിട്ടുണ്ടത്രെ

ദിലീപ് അടുത്ത സിനിമയായ തങ്കമണിയുടെ റിലീസിന് കാത്തിരിക്കുകയാണ്. മാർച്ച് മാസം ഏഴിനാണ് റിലീസ്. യഥാർത്ഥ സംഭവത്തെ അധികരിച്ച് തയ്യാറാക്കിയിരിക്കുന്ന ചിത്രം രതീഷ് രഘുനന്ദനൻ സംവിധാനം ചെയ്യുന്നു