അരങ്ങേറ്റം ഗംഭീരം, ഒടുവിൽ അജ്ഞാതവാസം; ആദ്യ ചിത്രത്തോടെ കരിയർ അവസാനിപ്പിച്ച നായികമാർ!

ബോളിവുഡിന്റെ വെള്ളിവെളിച്ചത്തിലേക്ക് ഓരോ വർഷവും നൂറുകണക്കിന് മുഖങ്ങളാണ് എത്താറുള്ളത്. എന്നാൽ ആദ്യ ചിത്രത്തിലൂടെ തന്നെ ചരിത്രം കുറിക്കുകയും പ്രേക്ഷകമനസ്സുകളിൽ ചിരപ്രതിഷ്ഠ നേടുകയും ചെയ്ത ചില നായികമാരുണ്ട്. 1989-ൽ ഭാഗ്യശ്രീയുടെ നിഷ്കളങ്കതയായാലും, 2001-ൽ സന്ദലി സിൻഹയുടെ ലാളിത്യമായാലും, 2004-ൽ ഗായത്രി ജോഷിയുടെ പക്വതയായാലും ഈ താരങ്ങൾ ഒറ്റ രാത്രികൊണ്ട് നേടിയെടുത്ത പ്രശസ്തി മറ്റാർക്കും അവകാശപ്പെടാനില്ലാത്തതാണ്. എന്നാൽ ഈ മിന്നും തുടക്കത്തിന് ശേഷം സിനിമാലോകത്ത് ഇവർക്ക് കാലിടറി. ആദ്യ ചിത്രത്തിന് ശേഷം കരിയർ ഗ്രാഫ് താഴേക്ക് പോയ, പിന്നീട് സിനിമയിൽ നിന്ന് തന്നെ അപ്രത്യക്ഷരായ പ്രമുഖ നായികമാരെ പരിചയപ്പെടാം.

ഗായത്രി ജോഷി: ഷാരൂഖ് ഖാൻ നായകനായ 'സ്വദേശ്' എന്ന ചിത്രത്തിലെ ഗീത എന്ന ലളിതമായ കഥാപാത്രത്തിലൂടെ ഗായത്രി ജോഷി നിരൂപകരുടെയും പ്രേക്ഷകരുടെയും പ്രശംസ ഒരുപോലെ പിടിച്ചുപറ്റിയ നടിയാണ് ഗായത്രി. നിരവധി പുരസ്കാരങ്ങൾ തേടിയെത്തിയെങ്കിലും ഇത് ഗായത്രിയുടെ ആദ്യത്തെയും അവസാനത്തെയും ചിത്രമായി മാറി. 2005-ൽ പ്രമുഖ വ്യവസായി വികാസ് ഒബ്‌റോയിയെ വിവാഹം കഴിച്ച ഗായത്രി ഇന്ന് മുംബൈയിൽ കുടുംബത്തോടൊപ്പമാണ്.

ഭാഗ്യശ്രീ: സൽമാൻ ഖാനൊപ്പം സുമൻ എന്ന കഥാപാത്രമായി എത്തിയ ഭാഗ്യശ്രീ ഇന്ത്യയുടെ തന്നെ 'നാഷണൽ ക്രഷ്' ആയി മാറി. പിന്നീട് ഏതാനും ചിത്രങ്ങളിൽ അഭിനയിച്ചെങ്കിലും മുഖ്യധാരാ സിനിമയിൽ നിന്ന് അവർ വേഗത്തിൽ വിട്ടുനിന്നു. കുട്ടിക്കാലത്തെ സുഹൃത്തായ ഹിമാലയ ദസാനിയെ വിവാഹം കഴിച്ച അവർ കുടുംബജീവിതത്തിന് മുൻഗണന നൽകി. അടുത്തിടെ 'തലൈവി', 'രാധേ ശ്യാം' തുടങ്ങിയ ചിത്രങ്ങളിൽ സഹനടിയായി അവർ തിരിച്ചെത്തിയിട്ടുണ്ട്.

സന്ദലി സിൻഹ: സംഗീതസാന്ദ്രമായ 'തും ബിൻ' എന്ന ചിത്രത്തിലെ 'പിയ'യെ ആർക്കും മറക്കാനാവില്ല. ആദ്യ ചിത്രം തന്നെ വൻ വിജയമായെങ്കിലും പിന്നീട് ചെയ്ത 'പിഞ്ജർ' പോലുള്ള ചിത്രങ്ങളിൽ നായിക എന്ന നിലയിൽ ആ പഴയ മാജിക് ആവർത്തിക്കാൻ അവർക്ക് കഴിഞ്ഞില്ല. വ്യവസായി കിരൺ സാൽസ്കറെ വിവാഹം കഴിച്ച സന്ദലി ഇന്ന് ഭർത്താവിന്റെ ബിസിനസ്സ് കാര്യങ്ങൾ നോക്കിനടത്തുകയാണ്.

അനു അഗർവാൾ : 'ആഷിഖി' എന്ന ഒറ്റ ചിത്രം അനു അഗർവാളിനെ സൂപ്പർതാര പദവിയിലേക്കാണ് ഉയർത്തിയത്. എന്നാൽ 1999-ലുണ്ടായ ഭീകരമായ ഒരു കാർ അപകടം അവരുടെ ജീവിതത്തെ മാറ്റിമറിച്ചു. ദിവസങ്ങളോളം കോമയിലായിരുന്ന അനു ഇന്ന് ഒരു യോഗ ഗുരുവാണ്. 'അനു അഗർവാൾ ഫൗണ്ടേഷൻ' വഴി അവർ സാമൂഹ്യപ്രവർത്തനങ്ങളിൽ സജീവമാണ്.

സ്നേഹ ഉള്ളാൽ : ഐശ്വര്യ റായിയുടെ രൂപസാദൃശ്യമുള്ള നടി എന്ന പേരിൽ സൽമാൻ ഖാനൊപ്പം അരങ്ങേറ്റം കുറിച്ച താരമാണ് സ്നേഹ ഉള്ളാൽ. ആദ്യ ചിത്രം ശ്രദ്ധിക്കപ്പെട്ടെങ്കിലും ബോളിവുഡിൽ ചുവടുറപ്പിക്കാൻ അവർക്കായില്ല. ഗുരുതരമായ ഒരു ഓട്ടോ ഇമ്മ്യൂൺ രോഗം ബാധിച്ചതിനെ തുടർന്ന് സിനിമാലോകത്ത് നിന്ന് അവർക്ക് നീണ്ട ഇടവേള എടുക്കേണ്ടി വന്നു. ഇപ്പോൾ ഒടിടി പ്ലാറ്റ്‌ഫോമുകളിലൂടെ തിരിച്ചുവരവിനുള്ള ശ്രമത്തിലാണ് സ്നേഹ.

ഗ്രേസി സിംഗ് " ഓസ്കാർ നോമിനേഷൻ ലഭിച്ച 'ലഗാൻ' എന്ന ചിത്രത്തിലൂടെ ആമിർ ഖാനൊപ്പം അരങ്ങേറ്റം കുറിച്ച ഗ്രേസി സിംഗ് പിന്നീട് 'മുന്നാഭായ് എംബിബിഎസ്' പോലുള്ള സൂപ്പർഹിറ്റുകളിലും അഭിനയിച്ചു. എന്നാൽ പിന്നീട് കരിയർ തകർന്നു. ഇന്ന് സിനിമ വിട്ട് ആത്മീയതയുടെ പാതയിലാണ് താരം. ബ്രഹ്മാകുമാരീസ് പ്രസ്ഥാനവുമായി ചേർന്ന് പ്രവർത്തിക്കുന്ന ഗ്രേസി ചില ടിവി പ്രോജക്റ്റുകളിൽ മാത്രമാണ് ഇപ്പോൾ പ്രത്യക്ഷപ്പെടാറുള്ളത്.