Meena Sagar | മീനയ്ക്കും കുടുംബത്തിനും സിദ്ധിഖ് ആരായിരുന്നു? ആ ഒരു കാര്യത്തിൽ പകരക്കാരനില്ല

സംവിധായകൻ സിദ്ധിഖിന്റെ (Siddique) വിയോഗം ഹൃദയഭേദകം എന്നാണ് അദ്ദേഹത്തിന്റെ സഹപ്രവർത്തകരും വേണ്ടപ്പെട്ടവരുമായ പലരും പറഞ്ഞത്. അത്രയേറെ അടുപ്പമുള്ളയൊരാളെയാണ് അവർക്ക് നഷ്‌ടമായതും. ആ വേദന അവരുടെ ഹൃദയങ്ങളെ സ്പർശിച്ചു മാത്രമേ കടന്നുപോയുള്ളൂ. നടി മീനയ്ക്കും (Meena Sagar) അതെ. സിദ്ധിഖ് ചിത്രത്തിൽ മീന നായികയായി വേഷമിട്ടിരുന്നു

സിദ്ധിഖ് രചനയും സംവിധാനവും നിർവഹിച്ച് ലാൽ ക്രിയേഷന്സിന്റെ ബാനറിൽ വിതരണം ചെയ്ത 'ഫ്രണ്ട്സ്' (1999) എന്ന ചിത്രത്തിൽ ജയറാമിന്റെ നായികയായാണ് മീന വേഷമിട്ടത്. പത്മിനി എന്ന അൽപ്പം വില്ലത്തരം കൂടി കലർന്ന കഥാപാത്രം അക്കാലങ്ങളിൽ ശ്രദ്ധപിടിച്ചുപറ്റി (തുടർന്ന് വായിക്കുക)

സിദ്ധിഖിന്റെ വിയോഗവർത്ത പോസ്റ്റ് ചെയ്തതും ആരാധകർ ആദ്യം ചൂണ്ടിക്കാട്ടിയതും ഫ്രണ്ട്‌സിലെ പത്മിനിയെയാണ്. പക്ഷെ പത്മിനിയിൽ തുടങ്ങി തീരുന്നതല്ല മീനയ്ക്ക് ആ ബന്ധം

'ഫ്രണ്ട്‌സ്' ഇറങ്ങി പിന്നെയും പത്തോളം വർഷങ്ങൾ കഴിഞ്ഞാണ് മീന വിവാഹജീവിതത്തിലേക്ക് പ്രവേശിച്ചത്. ഈ വിവാഹ സ്വീകരണത്തിലും സിദ്ധിഖ് അതിഥിയായി പങ്കെടുത്തു. രണ്ടു വർഷങ്ങൾ കൂടി കഴിഞ്ഞതും  മീനയുടെ മകൾ നൈനിക പിറന്നു

നൈനികയും അമ്മയുടെ വഴിയേ സിനിമയിലെത്തി. 'ഭാസ്കർ ദി റാസ്കൽ' എന്ന മലയാള ചിത്രത്തിന്റെ മൊഴിമാറ്റമായ 'ഭാസ്കർ ഒരു റാസ്കലിൽ' ബാലതാരമായി സിദ്ധിഖ് എന്ന സംവിധായകന്റെ മുന്നിൽ നൈനിക എത്തി

തന്നെയും മകളെയും സംവിധാനം ചെയ്ത മറ്റൊരു സംവിധായകനില്ല എന്നാണ് സിദ്ധിഖിന്റെ ഹൃദയഭേദകമായ വിയോഗവർത്ത പങ്കിട്ടുകൊണ്ടു മീന ഇൻസ്റ്റഗ്രാമിൽ കുറിച്ചത്. നൈനിക ഇപ്പോഴും സിനിമയിൽ സജീവമാണ്

മീന പിന്നെയും പലകുറി മലയാള സിനിമയിൽ അഭിനയിച്ചു. മോഹൻലാലിൻറെ ജോഡിയായാണ് മീനയെ മലയാള സിനിമയ്ക്ക് കൂടുതൽ പരിചയം. മമ്മൂട്ടി, മോഹൻലാൽ, സുരേഷ് ഗോപി, ജയറാം തുടങ്ങിയ സൂപ്പർതാരങ്ങളുടെ നായികയായി മീന സാഗർ മലയാള സിനിമയിൽ നിറഞ്ഞുനിന്നിട്ടുണ്ട്

പൃഥ്വിരാജ് സുകുമാരൻ സംവിധാനം ചെയ്ത രണ്ടാമത് ചിത്രം 'ബ്രോ ഡാഡി'യിൽ (2022) മീനയും മോഹൻലാലും വീണ്ടും ഒന്നിച്ചു. ഇതിനു ശേഷം മറ്റൊരു മലയാള ചിത്രത്തിൽ മീനയെ പ്രേക്ഷകർ കണ്ടില്ല