'ആ സമയം എത്തിയിരിക്കുന്നു'; യാത്ര പറഞ്ഞ് BTS ബാൻഡിലെ മൂന്നാമനും

ആരാധകരെ സങ്കടക്കടലിലാക്കി ബിടിഎസ് ബാൻഡിലെ മൂന്നാമനും യാത്ര പറയുകയാണ്. ദക്ഷിണ കൊറിയയിൽ പുരുഷന്മാർക്ക് നിർബന്ധിതമായ സൈനിക സേവനത്തിനാണ് ബിടിഎസ് താരങ്ങൾ ഓരോരുത്തരായി യാത്ര പറയുന്നത്.

നേരത്തേ, ജിൻ, ജെ-ഹോപ്പ് എന്നീ താരങ്ങൾ സൈനിക സേവനത്തിന് പോയിരുന്നു. ഇപ്പോൾ അവർക്കു പിന്നാലെ സുഗയും യാത്ര പറഞ്ഞിരിക്കുകയാണ്. സൈനിക സേവനത്തിന് പോകുന്നതിന് മുമ്പായി ആരാധകരോട് സുഗ യാത്ര പറഞ്ഞു കഴിഞ്ഞു.

വൈകാരികമായ ഒരു കുറിപ്പോടെയാണ് സുഗ ബിടിഎസ് ആർമിയോട് യാത്ര പറഞ്ഞത്. ഒടുവിൽ ആ സമയം എത്തി എന്ന കുറിപ്പോടെയാണ് ദക്ഷിണ കൊറിയയിലെ സോഷ്യൽമീഡിയയായ വിവേഴ്സിൽ സുഗ തുടങ്ങിയത്.

സൈനിക സേവനം പൂർത്തിയാക്കി താൻ മടങ്ങി വരും. എല്ലാവരേയും 2025 ൽ വീണ്ടും കാണാം. ഇങ്ങനെയായിരുന്നു താരത്തിന്റെ കുറിപ്പ്. സുഗയുടെ യാത്രാ കുറിപ്പ് ആരാധകരും ഏറ്റെടുത്തിരിക്കുകയാണ്.

എത്രയും വേഗം സൈനിക സേവനം പൂർത്തിയാക്കി പ്രിയ താരങ്ങളെല്ലാം മടങ്ങിയെത്തുന്നതിനായി കാത്തിരിക്കുകയാണെന്നാണ് ആരാധകർ മറുപടിയായി പറഞ്ഞത്. വെള്ളിയാഴ്ച്ചയാണ് സുഗയുടെ സൈനിക സേവനം ആരംഭിക്കുന്നത്.

സൈനിക സേവന സമയത്ത് ബിടിഎസ് താരങ്ങളെ സന്ദർശിക്കാൻ ആരാധകർ ശ്രമിക്കരുതെന്നും താരത്തെ യാത്രയയക്കാൻ ആരും എത്തരുതെന്നും ഏജൻസിയായ ബിഗ് ഹിറ്റ് അഭ്യര‍്ത്ഥിച്ചിരുന്നു.

സുഗയ്ക്കു പിന്നാലെ, ആർഎം, ജിമിൻ, വി, ജങ്കൂക്ക് എന്നീ ബിടിഎസ് താരങ്ങളും സൈനിക സേവനത്തിനായി ഉടൻ യാത്ര തിരിക്കും. സൈനിക സേവനം പൂർത്തിയാക്കി 2025 ഓടെ താരങ്ങളെല്ലാം വീണ്ടും ഒന്നിക്കും.