Vijay Devarakonda |'അവർ ദൈവത്തിന് തുല്യർ'; പ്ലാസ്മ ചികിത്സയ്ക്ക് സന്നദ്ധരായവരെ ആദരിച്ച് വിജയ് ദേവരകൊണ്ട

ഹൈദരാബാദ്: കോവിഡ് ചികിത്സയ്ക്കായി പ്ലാസ്മാ ദാതാക്കളെ ആദരിച്ച് വിജയ് ദേവരകൊണ്ട. ഹൈദരാബാദ് സൈബർ പൊലീസ് സംഘടിപ്പിച്ച ചടങ്ങിലാണ് ആദരം.

വാക്സിൻ കണ്ടെത്തുന്നതുവരെ പ്ലാസ്മ ചികിത്സ മാത്രമാണ് കോവിഡിനെതിരെയുള്ള ഏകമാർഗമെന്ന് താരം പറഞ്ഞു.

നിലവിലെ സാഹചര്യത്തിൽ പ്ലാസ്മ ചികിത്സയുടെ പ്രധാന്യത്തെ കുറിച്ച് ജനങ്ങൾ ബോധവാന്മാരാകണമെന്ന് വിജയ് ദേവരകൊണ്ട ആവശ്യപ്പെട്ടു.

ചടങ്ങിൽ പ്ലാസ്മ ചികിത്സയ്ക്ക് സന്നദ്ധരായ 126 പേരെ ആദരിച്ചു. വിജയ് ദേവരകൊണ്ടയായിരുന്നു ചടങ്ങിലെ മുഖ്യാതിഥി.

ചടങ്ങിൽ പ്ലാസ്മ ചികിത്സ ആവശ്യമായി വന്ന തന്റെ സുഹൃത്തുക്കളുടെ കാര്യവും വിജയ് പറഞ്ഞു.

പ്ലാസ്മ ആവശ്യമായി വന്ന സുഹൃത്തുക്കൾക്ക് അത് ലഭിക്കാതിരുന്നതിനെ കുറിച്ചായിരുന്നു അദ്ദേഹം പറഞ്ഞത്.

പ്ലാസ്മ ചികിത്സയുമായി ബന്ധപ്പെട്ടുള്ള തെറ്റിദ്ധാരണകൾ ഒഴിവാക്കണമെന്നും താരം ആവശ്യപ്പെട്ടു.

കോവിഡ് മുക്തരായവർ പ്ലാസ്മ നൽകാൻ തയ്യാറായി മുന്നോട്ടു വരേണ്ടത് ഇന്നത്തെ സാഹചര്യത്തിന്റെ ആവശ്യമാണ്. വാക്സിൻ കണ്ടെത്തുന്നതുവരെ ഇതാണ് കോവിഡിനെ പ്രതിരോധിക്കാനുള്ള മാർഗം. -താരം പറഞ്ഞു.

വാക്സിൻ എന്നു കണ്ടെത്തുമെന്നതിനെ കുറിച്ച് നമുക്ക് യാതൊരു സൂചനയുമില്ല. പ്ലസ്മ മാത്രമാണ് നമ്മുടെ കയ്യിലുള്ള ആയുധം.

തനിക്ക് കോവിഡ് ബാധിച്ചാൽ അതിൽ നിന്ന് മുക്തനാകുകയാണെങ്കിൽ രണ്ടാമതൊന്ന് ആലോചിക്കാതെ പ്ലാസ്മ ചികിത്സയക്ക് സന്നദ്ധനാകുമെന്നും വിജയ് ദേവരകൊണ്ട.