26കാരന് 56 കാരിയോട് പ്രണയം: ചൂരൽ കഷായത്തിനൊപ്പം അമ്മേ എന്ന് വിളിപ്പിച്ച് ഏത്തമിടീപ്പിച്ച് പൊലീസ്

പത്തനാപുരം: അൻപത്തിയാറ് വയസുള്ള വിധവയോട് പ്രണയാഭ്യർഥന നടത്തിയ 26 കാരന് മാതൃകാപരമായ ശിക്ഷ വിധിച്ച് പൊലീസ്. നാലു വർഷമായി തുടങ്ങിയ ശല്യം സഹിക്കാനാകാതെയാണ് 56 കാരി പൊലീസിനെ സമീപിച്ചത്. അശ്ലീലച്ചുവയുള്ള മുന്നൂറോളം മെസേജുകളാണ് യുവാവ് വാട്സാപ്പിലൂടെ അയച്ചത്.

കനാലിൽ നിന്നും മൃതദേഹം പുറത്തെടുക്കാന്‍ 2000 രൂപ പ്രതിഫലം ആവശ്യപ്പെട്ടപ്പോള്‍ യൂണിഫോം അഴിച്ചുവച്ച് കൈലിമുണ്ടുടുത്ത് കനാലിലേക്കിറങ്ങിയ പത്തനാപുരം സി.ഐ അന്‍വറിന്റെ നേതൃത്വത്തിലാണ് 'കാമുകനെ' പിടികൂടിയത്.

മൊബൈലില്‍ അശ്ലീല ചുവയുള്ള സന്ദേശങ്ങളും ചിത്രങ്ങളും വരുന്നുവെന്നായിരുന്നു വീട്ടമ്മയുടെ പരാതി.  ഇഷ്ടമാണെന്നും കണ്ടാല്‍ പ്രായം തോന്നില്ലെന്നുമൊക്കെയായിരുന്നു സന്ദേശം.

പരാതിയിൽ കഴമ്പുണ്ടെന്നു കണ്ട സി.ഐ വീട്ടമ്മയുടെ ഫോണില്‍ നിന്ന് വനിതാ പൊലീസിനെ കൊണ്ട് യുവാവിനെ വിളിപ്പിച്ചു.

ഒന്നു കാണണമെന്നു പറഞ്ഞപ്പോള്‍, ദാ എത്തിയെന്നായിരുന്നു മറുപടി. വഴിയില്‍ കാത്തുനിന്ന പൊലീസ് കാമുകനെ കൈയ്യോടെ പിടികൂടി സ്റ്റേഷനിലെത്തിച്ചു.

വാട്സ്ആപ്പ് 'കാമുകനെ' കണ്ട പരാതിക്കാരിയും പൊലീസും ഞെട്ടി. അമ്മയുടെ ബ്ലൗസും മറ്റും തയ്പ്പിക്കാന്‍ സ്ഥിരമായി പരാതിക്കാരിയുടെ കടയിലെത്തുന്ന പയ്യന്‍.

സി.ഐ വിരട്ടിയതോടെ കേസെടുക്കരുതെന്നും വിദേശത്ത് ജോലി ശരിയായെന്നും പറഞ്ഞ് യുവാവ് കരച്ചിൽ തുടങ്ങി. ഇതോടെ വീട്ടമ്മയുടെയും മനസലിഞ്ഞു.

തനിക്ക് 30 വയസുള്ള മകനുണ്ടെന്നും അവന്‍ വിദേശത്താണെന്നും, കേസൊന്നും വേണ്ടെന്നും അവർ പറഞ്ഞു.

ഇതോടെ, പരാതിക്കാരിയെ അമ്മേ എന്നു വിളിച്ച് ഏത്തമിടാന്‍ സി.ഐ നിര്‍ദേശിച്ചു. അക്ഷരംപ്രതി അനുസരിച്ച യുവാവിന് ചൂരൽ കഷായവും നൽകി, രണ്ടു പേരുടെ ജാമ്യത്തിലാണ് വിട്ടയച്ചത്.