വയറുവേദനയെ തുടർന്ന് ആശുപത്രിയിലെത്തിയ പതിനാലുകാരി എട്ടുമാസം ഗർഭിണി; പീഡിപ്പിച്ച 35കാരൻ അറസ്റ്റിൽ

അനന്ത്നാഗ്: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച് ഗർഭിണിയാക്കിയ 35കാരൻ അറസ്റ്റിൽ. തെക്കൻ കശ്മീരിലെ അനന്ത്നാഗ് സ്വദേശിയാണ് അറസ്റ്റിലായത്. 14 വയസുള്ള പെൺകുട്ടിയാണ് പീഡനത്തിനിരയായത്. കുട്ടിയുടെ പരാതിയുടെ അടിസ്ഥാനത്തിലാണ് ഇയാളെ അറസ്റ്റ് ചെയ്തത്.

വയറുവേദനയെ തുടർന്ന് പെൺകുട്ടിയെ ആശുപത്രിയിലെത്തിച്ചപ്പോഴാണ് പെൺകുട്ടി എട്ട് മാസം ഗർഭിണിയാണെന്ന കാര്യം പുറത്തറിഞ്ഞതെന്നാണ് കുടുംബം പറയുന്നത്. ഉടൻ തന്നെ ഇവർ പൊലീസിൽ പരാതി നൽകുകയായിരുന്നു. പോക്സോ നിയമപ്രകാരം ഉൾപ്പെടെയാണ് കേസ് എടുത്തത്.

പെൺകുട്ടിയുടെ അമ്മയുടെ ബന്ധുവായ ആളാണ് പ്രതി. ഇയാൾ വീട്ടു ജോലികളിൽ സഹായിക്കുന്നതായി ഇടയ്ക്ക് വീട്ടിൽ വരാറുണ്ട്. ഇതിനിടെയാണ് പീഡിപ്പിച്ചത്. കഴിഞ്ഞ കുറേ മാസമായി പീഡനം തുടരുകയായിരുന്നു.

മയക്കിയ ശേഷമാണ് ഇയാൾ പെൺകുട്ടിയെ പീഡിപ്പിച്ചതെന്നാണ് പെൺകുട്ടിയുടെ മൊഴി. പീഡന വിവരം പുറത്തു പറയരുതെന്ന് ഇയാൾ ഭീഷണിപ്പെടുത്തിയിരുന്നു. ഇത് മുതലാക്കിയാണ് പീഡനം തുടർന്നത്.

അതേസമയം സംഭവത്തെ തുടർന്ന് പ്രദേശവാസികൾ പ്രതിക്കെതിരെ രംഗത്തെത്തിയിട്ടുണ്ട്. ഇത്തരക്കാർക്ക് കടുത്ത ശിക്ഷ നൽകണമെന്നാണ് ഇവരുടെ ആവശ്യം. ഇത്തരം കേസുകളിൽ വിചാരണ വൈകരുതെന്ന് സാമൂഹ്യ പ്രവർത്തകരും ആവശ്യപ്പെട്ടിട്ടുണ്ട്.