നിർഭയ കേസ്: രണ്ടാമത്തെ ദയാഹർജിയും തള്ളി; വധശിക്ഷയിൽ ഉത്തരവ് ഉടൻ

ന്യൂഡൽഹി: നിർഭയ കേസിൽ വധശിക്ഷ നടപ്പാക്കുന്നത് സംബന്ധിച്ച് പുതിയ ഉത്തരവ് ഉടൻ പുറത്തുവരും. അക്ഷയ് സിങ്, പവൻ ഗുപ്ത എന്നിവർ സമർപ്പിച്ച രണ്ടാമത്തെ ദയാഹർജിയും രാഷ്ട്രപതി തള്ളിയിരുന്നു. പ്രതി മുകേഷ് സിങിന്‍റെ ഹർജി സുപ്രീം കോടതി രണ്ടരയ്ക്ക് പരിഗണിക്കും.

വധശിക്ഷ നാളെത്തന്നെ നടപ്പാക്കാമെന്നും പ്രതികൾക്ക് നിയമപരമായ അവകാശങ്ങൾ ഒന്നും ബാക്കിയില്ലെന്നും പ്രോസിക്യൂട്ടർ കോടതിയെ അറിയിച്ചു.

രണ്ട് പ്രതികളുടെ രണ്ടാമത്തെ ദയാഹർജിയും രാഷ്ട്രപതി തള്ളിയതോടെ നിയമപരമായി പ്രതികൾക്ക് ഉണ്ടായിരുന്ന എല്ലാ സാധ്യതകളും അവസാനിച്ചതായി നിയമവിദഗ്ദ്ധർ പറയുന്നു.

നിയമപരമായ അവകാശങ്ങൾ പരമാവധി ഉപയോഗിച്ച് ശിക്ഷ നടപ്പാക്കുന്നത് വൈകിപ്പിക്കാൻ പ്രതികൾക്ക് കഴിഞ്ഞു. ഈ ശ്രമങ്ങൾ ഇപ്പോഴും തുടരുന്നു.

ഇതിന്‍റെ ഭാഗമായാണ് മുകേഷ് സിങ് രാഷ്ട്രപതിക്ക് രണ്ടാം ദയാഹർജി നൽകിയത്.

ഇതുകൂടാതെ കേസിലെ മറ്റൊരു പ്രതിയായ അക്ഷയ് സിങിന്‍റെ ഭാര്യ ഔറംഗാബാദ് കോടതിയിൽ വിവാഹമോചന ഹർജി സമർപ്പിക്കുകയും ചെയ്തിരുന്നു.

നാളെ രാവിലെ അഞ്ചരയ്ക്ക് തീഹാർ ജയിലിലാണ് നിർഭയ കേസ് പ്രതികളുടെ വധശിക്ഷ നടപ്പാക്കുന്നത്. കേസിലെ മുഖ്യപ്രതികളായ വിനയ് ശർമ്മ, പവൻ ഗുപ്ത, മുകേഷ് സിങ്, അക്ഷയ് സിങ് എന്നിവരെയാണ് വധശിക്ഷയ്ക്ക് വിധേയമാക്കുന്നത്.