തൃശൂരിൽ വീണ്ടും വൻ സ്പിരിറ്റുവേട്ട ; വീട്ടിൽ സൂക്ഷിച്ച 1700 ലിറ്റർ സ്പിരിറ്റ് പിടികൂടി

തൃശൂർ : തൃശൂർ നഗരത്തിൽ വീണ്ടും വൻ സ്പിരിറ്റുവേട്ട. 1700 ലിറ്റർ സ്പിരിറ്റാണ് പിടികൂടിയത്.

നഗരത്തിൽ നിന്ന് മൂന്ന് കിലോമീറ്റർ ദൂരെ നെല്ലങ്കരയിൽ നിന്നാണ് സ്പിരിറ്റ് പിടികൂടിയത്. വീട്ടിലെ ഗോഡൗണിൽ സൂക്ഷിച്ച നിലയിലായിരുന്നു .

തൃശൂർ ഡെപ്യുട്ടി എക്സൈസ് കമ്മീഷ്ണർ കെ പ്രദീപ്കുമാറിന് ലഭിച്ച രഹസ്യ വിവരപ്രകാരമായിരുന്നു പരിശോധന. തൃശൂർ സർക്കിൾ ഇൻസ്‌പെക്ടർ കെ മോഹനന്റെ നേതൃത്വത്തിൽ നഗര മധ്യത്തിലെ മൂന്നുനില വീട് വളഞ്ഞു പ്രതിയെ പിടികൂടുകയായിരുന്നു.

കന്നാസുകളിലും, കണ്ടയ്നറുകളിലും ആയി സജ്ജീകരിച്ച സംവിധാനമാണ് എക്സൈസിന്റെ നിരീക്ഷണത്തിനൊടുവിൽ കണ്ടെത്തിയത്.

വലിയ വീട് വാടകക്കെടുത്തു കുടുംബമായി താമസിക്കുന്നതായി വരുത്തിയാണ് ഇടപാട്.

പാലക്കാട് ഉള്ള വിവിധ ഗോഡൗണുകളിൽ നിന്നും സ്പിരിറ്റ് എത്തിക്കുന്നതായി തൃശൂർ എക്സൈസിന് രഹസ്യ വിവരം ഉണ്ടായിരുന്നു.

കഴിഞ്ഞ ദിവസം തൃശൂർ നെൻ മണിക്കരയിലെ വീട്ടിൽ നിന്ന് 2500 ലിറ്റർ സ്പിരിറ്റുമായി മൂന്ന് പേരെ എക്സൈസ് പിടികൂടിയിരുന്നു.

70 കന്നാസുകളിൽ സൂക്ഷിച്ചിരുന്ന സ്പിരിറ്റാണ് ഇവിടെ നിന്ന് പിടികൂടിയത്. രഞ്ജിത്, ദയാനന്ദൻ, ജെയിംസ് എന്നിവരാണ് പിടിയിലായത്.

രഞ്ജിത്തിന്റെ വീട്ടിലാണ് സ്പിരിറ്റ് സൂക്ഷിച്ചിരുന്നത്. സ്പിരിറ്റ് ഉണ്ടെന്ന സന്ദേശം ലഭിച്ചതിനെ തുടർന്ന് എക്സൈസ് സംഘം ഇവിടെ ക്യാംപ് ചെയ്ത് നിരീക്ഷിച്ച് വരികയായിരുന്നു.