ആരോഗ്യമന്ത്രിക്കെതിരെ സോഷ്യൽമീഡിയയിൽ അധിക്ഷേപം; മലപ്പുറത്ത് യുവാവ് അറസ്റ്റിൽ

മലപ്പുറം: ആരോഗ്യമന്ത്രി കെ.കെ ശൈലജയ്ക്കെതിരെ സോഷ്യൽമീഡിയയിൽ അധിക്ഷേപകരമായ കമന്‍റിട്ട യുവാവ് അറസ്റ്റിൽ.

മലപ്പുറം വെട്ടത്തൂർ മണ്ണാർമലയിലെ കൈപ്പിള്ളി വീട്ടിൽ അൻഷാദ്(35) ആണ് അറസ്റ്റിലായത്.

മേലാറ്റൂർ എസ്.ഐ ഷമീറിന്‍റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.

അൻഷാദിനെ അറസ്റ്റുചെയ്തു പിന്നീട് ജാമ്യത്തിൽ വിട്ടു.

മറ്റൊരു പോസ്റ്റിന് ചുവടെ നൽകിയ കമന്‍റിലാണ് അൻഷാദ് ആരോഗ്യമന്ത്രി അധിക്ഷേപിച്ചത്.

ഇതോടെ നിരവധിപ്പേർ ഈ കമന്‍റിനെതിരെ രംഗത്തെത്തി. ഇതോടെ കമന്‍റ് നീക്കം ചെയ്തു സ്വന്തം പേജിലൂടെ മാപ്പ് ചോദിച്ചുകൊണ്ട് പുതിയ പോസ്റ്റ് അൻഷാദ് ഇടുകയും ചെയ്തു.

എന്നാൽ സംഭവം ശ്രദ്ധയിൽപ്പെട്ട പൊലീസ് സ്വമേധയാ കേസെടുക്കുകയായിരുന്നു.

പ്രകോപനം സൃഷ്ടിച്ച് ലഹളയും ചേരിതിരിവും ഉണ്ടാക്കാൻ ശ്രമിച്ചു, അനാവശ്യ പരാമർശങ്ങളിലൂടെ വ്യക്തിഹത്യനടത്തി തുടങ്ങിയ കുറ്റങ്ങളാണ് പ്രതിക്കെതിരെ ചുമത്തിയിരിക്കുന്നത്.