Mammootty | പീലി മോളെ തേടി മമ്മൂക്കയുടെ പിറന്നാൾ സമ്മാനം 

മമ്മൂട്ടിയുടെ പിറന്നാളിന് കൊണ്ടു പോയില്ലെന്ന് പറഞ്ഞു കരഞ്ഞ പീലി  മോളുടെ പിറന്നാളായിരുന്നു ശനിയാഴ്ച. പിറന്നാൾ ദിവസം പീലി മോളെ തേടി വന്നത് അപ്രതീക്ഷിത സമ്മാനങ്ങളും ആശംസകളും

ഉപ്പയ്ക്കും ഉമ്മയ്ക്കും കൂട്ടുകാർക്കുമൊപ്പം കേക്ക് മുറിക്കാൻ നിൽക്കുമ്പോഴാണ് പീലി മോളെ കാണാൻ രണ്ട് പെട്ടികളുമായി രണ്ട് പേർ വരുന്നത്

ഒരു കേക്കും കുഞ്ഞുടുപ്പും. പിറന്നാളിന് പീലി മോൾക്ക് കൊച്ചിയിൽ നിന്നും ഒരാളുടെ സമ്മാനം ആണ്. മറ്റാരുമല്ല; മമ്മൂട്ടിയാണ് പീലിമോളുടെ പിറന്നാൾ ദിനം അവിസ്മരണീയം ആക്കിയത്. മമ്മൂട്ടി അയച്ച കേക്ക് മുറിച്ച് ആഘോഷിക്കുമ്പോൾ പിന്നാലെ മറ്റൊരു സർപ്രൈസ്! വീഡിയോ കോളിൽ അതാ മമ്മൂട്ടി തന്നെ പീലി മോൾക്ക് ആശംസയുമായി വരുന്നു

"മോൾക്ക് സന്തോഷമായോ? പിണക്കം ഒക്കെ മാറിയോ?" മമ്മൂക്കയുടെ ചോദ്യങ്ങൾക്ക് തല കുലുക്കി പീലിയുടെ മറുപടി. പിന്നാലെ നാണം കുണുങ്ങി ചിരിച്ചു. കൊറോണ ഒക്കെ പോയിട്ട് നേരിൽ കാണാം എന്നും മമ്മൂക്ക പറഞ്ഞതോടെ പീലിക്ക് വലിയ സന്തോഷമായി

മമ്മൂട്ടിയുടെ പിറന്നാൾ ആഘോഷത്തിന് കൊണ്ടുപോയില്ല എന്ന് പറഞ്ഞ് പീലി മോൾ എന്ന ദുവ കരഞ്ഞതിന്റെ വീഡിയോ മമ്മൂട്ടി തന്നെ സമൂഹ മാധ്യമങ്ങളിൽ പങ്ക് വെക്കുകയും അത് പിന്നീട് വൈറലാകുകയും ചെയ്തു

മലപ്പുറം പെരിന്തൽമണ്ണ തിരൂർക്കാട് സ്വദേശി ഹമീദലി പുന്നക്കാടന്റേയും സജിലയുടെയും മകൾ ആണ് ഈ നാല് വയസുകാരി. മമ്മൂട്ടി ഫാൻസ് ആൻഡ് വെൽഫെയർ അസോസിയേഷന്റെ പെരിന്തൽമണ്ണ താലൂക്ക് വൈസ് പ്രസിഡൻറ് ആണ് ഹമീദലി