Mohanlal | 'പഴയ അക്കോസേട്ടനും പുതിയ ഉണ്ണിക്കുട്ടനും' ഫോട്ടോ പങ്കുവെച്ച് മോഹന്‍ലാല്‍; 'യോദ്ധാ 2' വരുമോയെന്ന് ആരാധകര്‍

മലയാള സിനിമാ പ്രേക്ഷകര്‍ക്കിടയില്‍ എക്കാലവും പ്രിയപ്പെട്ട ചിത്രമാണ് യോദ്ധാ. സംഗീത് ശിവന്‍റെ സംവിധാനത്തില്‍ 1992ല്‍ റിലീസായ ചിത്രം ഇന്നും ടിവിയില്‍ സംപ്രേക്ഷണം ചെയ്യുമ്പോള്‍ കണ്ട് ആസ്വദിക്കുന്നവരാണ്.

നേപ്പാളിന്‍റെ പശ്ചാത്തലത്തില്‍ ഒരുക്കിയ ചിത്രത്തില്‍ മോഹന്‍ലാല്‍, ജഗതി ശ്രീകുമാര്‍, സിദ്ധാര്‍ത്ഥ ലാമ, മധുബാല, ഉര്‍വശി തുടങ്ങിയവരാണ് പ്രധാന വേഷത്തിലെത്തിയത്. എ.ആര്‍ ആദ്യമായി സംഗീതം ഒരുക്കിയ ചിത്രം കൂടിയായിരുന്നു യോദ്ധ.

നേപ്പാളിലെ ലാമയായ സന്ന്യാസി ബാലനായ റിംപൊച്ചെ എന്ന ഉണ്ണിക്കുട്ടനും അവന്‍റെ പ്രിയപ്പെട്ട അക്കോസേട്ടനും (അശോകേട്ടന്‍) തമ്മിലുള്ള സ്നേഹം സിനിമ കണ്ടവരാരും മറന്നുകാണില്ല.

ഇപ്പോഴിതാ പഴയ അശോകേട്ടന്‍ പുതിയ ഉണ്ണിക്കുട്ടനെ പരിചയപ്പെടുത്തിക്കൊണ്ടുള്ള ഒരു ചിത്രം സമൂഹമാധ്യമങ്ങളിലൂടെ പങ്കുവെച്ചിരിക്കുകയാണ് മോഹന്‍ലാല്‍.

നേപ്പാള്‍ യാത്രക്കിടെ കണ്ടുമുട്ടിയ സന്യാസി ബാലനൊപ്പമുള്ള ചിത്രത്തിന് ' പഴയ അശോകേട്ടനും പുതിയ ഉണ്ണിക്കുട്ടനും' എന്നാണ് മോഹന്‍ലാല്‍ പേര് നല്‍കിയിരിക്കുന്നത്.

ഫോട്ടോ കണ്ടതോടെ യോദ്ധയ്ക്ക് ഒരു രണ്ടാം ഭാഗം ഉണ്ടാകുമോ എന്ന ചോദ്യവുമായി ആരാധകരെത്തി. ചിലര്‍ക്ക് ആകട്ടെ മോഹന്‍ലാലിന്‍റെ കൈവശം ഇരിക്കുന്ന മാലയിലായിരുന്നു കണ്ണ്.

ചിത്രം ഇറങ്ങി വര്‍ഷങ്ങള്‍ക്ക് ശേഷം 2015ല്‍ അന്നത്തെ ഉണ്ണിക്കുട്ടനായെത്തിയ സിദ്ധാര്‍ത്ഥ ലാമയും മോഹന്‍ലാലും കണ്ടുമുട്ടിയിരുന്നു. ലാലേട്ടനൊപ്പം വീണ്ടും അഭിനയിക്കാനുള്ള ആഗ്രഹവും സിദ്ധാര്‍ത്ഥ പങ്കുവെച്ചിരുന്നു.

നല്ലൊരു കഥയ്ക്കുള്ള പ്ലോട്ട് കിട്ടിയില്‍ യോദ്ധയ്ക്ക് രണ്ടാം ഭാഗം ഒരുക്കാന്‍ ശ്രമിക്കുമെന്ന് സംവിധായകന്‍ സംഗീത് ശിവനും പറഞ്ഞിരുന്നു.