Ambili Devi and Jayan | ഇതിനൊന്നും മറുപടിയില്ല എന്ന് ജയൻ; പ്രൊഫൈൽ ചിത്രവും പേരും മാറ്റി അമ്പിളി ദേവി

'ജീവിതം' എന്ന് ക്യാപ്‌ഷൻ നൽകി ശോക വീഡിയോ പോസ്റ്റ് ചെയ്ത ശേഷം തന്റെ ഫേസ്ബുക് പ്രൊഫൈൽ പേരും പ്രൊഫൈൽ ചിത്രവും മാറ്റി അമ്പിളി ദേവി. അമ്പിളി ആദിത്യൻ എന്ന പേര് മാറ്റി അമ്പിളി ദേവി എന്നാണ് ഇപ്പോൾ പ്രൊഫൈൽ പേര്. അമ്പിളിയും ഭർത്താവും കൂടിയുള്ള ചിത്രം മാറ്റി മക്കളുടെ ചിത്രമാണ് ഇപ്പോൾ പോസ്റ്റ് ചെയ്തിരിക്കുന്നത്

അമ്പിളിയുടെ വീഡിയോ ചർച്ചയായപ്പോൾ ജയൻ എന്ന ആദിത്യൻ വനിത ഓൺലൈനിന്‌ നൽകിയ അഭിമുഖത്തിൽ "ഒന്നുമില്ല ഇതിനൊന്നും മറുപടിയുമില്ല. ഇപ്പോഴും അമ്പിളി എന്റെ ഭാര്യയാണ്," എന്നായിരുന്നു പറഞ്ഞത്. എന്നാൽ അമ്പിളി ഫേസ്ബുക് പ്രൊഫൈലിൽ ഉണ്ടായിരുന്ന ആദിത്യനുമൊത്തുള്ള ചിത്രങ്ങളും നീക്കം ചെയ്തിട്ടുമുണ്ട്. വാർത്തകളോടുള്ള പ്രതികരണമെന്ന നിലയിൽ ജയൻ നൽകിയ മറുപടിയുടെ കൂടുതൽ ഭാഗങ്ങൾ ചുവടെ (തുടർന്ന് വായിക്കുക)

"കൂടുതല്‍ എന്ത് പറയണം. ഞാന്‍ ഇത്തരത്തില്‍ പണ്ട് മുതലേ പഴി കേള്‍ക്കുന്ന ആളായതിനാല്‍ വലിയ ഫീല്‍ ഒന്നും ഇല്ല. എനിക്ക് ഇതൊന്നും ശ്രദ്ധിക്കാനുള്ള സമയമില്ലെന്നതാണ് പ്രധാനം. കുറേ കാലമായി നൂറ് കൂട്ടം പ്രശ്‌നങ്ങളിലും കടത്തിലുമാണ് ഞാന്‍," ജയൻ പറഞ്ഞു

'കഥയറിയാതിന്നു സൂര്യൻ സ്വർണ്ണ താമരയെ കൈവെടിഞ്ഞോ' എന്ന ശോകമയമായ ഗാനശകലമാണ് അമ്പിളി പോസ്റ്റ് ചെയ്തത്. അമ്പിളിക്ക് എന്തുപറ്റി എന്ന തരത്തിൽ ആരാധകർ കമന്റുകൾ വഴി ചോദിച്ചിരുന്നു. പക്ഷെ ഒന്നിനോടും അമ്പിളി പ്രതികരിച്ചില്ല

2019ലാണ് അമ്പിളിയും ആദിത്യനും തമ്മിലെ വിവാഹം. ഇരുവരുടേതും പുനർവിവാഹമായിരുന്നു. അധികം വൈകാതെ അമ്പിളിക്കും ആദിത്യനും ഒരു മകൻ പിറന്നു. അർജുൻ എന്നാണ് മകന് പേര്. അമർനാഥ് എന്നാണ് അമ്പിളിയുടെ മൂത്ത മകന്റെ പേര്. ആദിത്യൻ ഇപ്പോൾ തന്റെ അക്കൗണ്ട് ലോക്ക് ചെയ്തിരിക്കുകയാണ്.

അടുത്തിടെ ആദിത്യൻ തന്റെ പഴയ പേരിലേക്ക് മടങ്ങിപ്പോയിരുന്നു. ഇപ്പോൾ ജയൻ എസ്.എസ്. എന്ന പേരിലാണ് സോഷ്യൽ മീഡിയ പേജുകളിൽ ആദിത്യൻ ഉള്ളത്. അമ്പിളിയും ആദിത്യനും ഒരു സീരിയലിൽ ഒന്നിച്ചഭിനയിച്ച ശേഷമായിരുന്നു വിവാഹം. ചിത്രത്തിൽ കാണുന്നതാണ് അമ്പിളിയുടെ ഇപ്പോഴത്തെ പ്രൊഫൈൽ ചിത്രവും പേരും