അൻവർ ഡിഎംകെയിലേക്ക്? ചെന്നൈയിലെത്തി നേതാക്കളുമായി ചർച്ച നടത്തി; ലക്ഷ്യം ഇന്ത്യ മുന്നണിയെന്ന് സൂചന

വിവാദങ്ങളെ തുടർന്ന് എൽഡിഎഫ് വിട്ട പി.വി അൻവർ എം.എൽ.എ ഡി.എം.കെയിലേക്കെന്ന് സൂചന. അൻവർ ചെന്നൈയിലെത്തി ഡിഎംകെ നേതാക്കളുമായി കൂടിക്കാഴ്ച നടത്തിയതിന്റെ ദൃശ്യങ്ങൾ അടക്കം പുറത്ത് വന്നിട്ടുണ്ട്. ഡിഎംകെയിലൂടെ ഇന്ത്യ മുന്നണിയാ‌ണ് അൻവർ ലക്ഷ്യമിടുന്നതെന്നാണ് സൂചന.

ഡിഎംകെ നേതാവും മന്ത്രിയുമായ സെന്തിൽ ബാലാജി വഴിയാണ് പി വി അൻവർ ഡിഎംകെയുമായി ഒരു ബന്ധത്തിന് ശ്രമിക്കുന്നതെന്നാണ് റിപ്പോർട്ടുകൾ. സെന്തിൽ ബാലാജിയടക്കമുള്ള നേതാക്കളുമായുള്ള അൻവറിന്റെ മകന്റെ ചിത്രങ്ങളും പുറത്ത് വന്നിട്ടുണ്ട്. അൻവർ ഡിഎംകെയിലേക്ക് ലയിക്കാനുള്ള സാധ്യത കുറവാണ്.

ഒരു പാർട്ടി രൂപീകരിച്ചതിനു ശേഷം, ഡിഎംകെയുമായി സഹകരിക്കാനാണ് കൂടുതൽ സാധ്യത. കൂടിക്കാഴ്ചയിൽ ഡിഎംകെയുടെ രാജ്യസഭാംഗം എംപി എം.എം.അബ്ദുള്ളയും പങ്കെടുത്തിരുന്നു.

ശനിയാഴ്ച പുലർച്ചെയാണ് പി.വി അൻവർ ചെന്നൈയിലേക്ക് പോയത്. ഞായറാഴ്ച വൈകിട്ട് വിളിച്ചുചേർത്തിരിക്കുന്ന പൊതുയോ​ഗത്തിൽ നിർണായക പ്രഖ്യാപനങ്ങളുണ്ടാകാനും സാധ്യതയുണ്ട്. ചെന്നൈയിലെ കെടിഡിസി റെയിൻ ഡ്രോപ്സ് ഹോട്ടലിൽ വച്ചാണ് കൂടിക്കാഴ്ച നടന്നത്.

മുസ്ലീം ലീഗിന്റെ തമിഴ്നാട് ജനറൽ സെക്രട്ടറി കെ.എ.എം.മുഹമ്മദ് അബൂബക്കർ, ലീഗിന്റെ മറ്റ് സംസ്ഥാന നേതാക്കൾ എന്നിവർ ചെന്നൈയിലെ കൂടിക്കാഴ്ചയിൽ ഉണ്ടായിരുന്നതായി സ്ഥിരീകരിക്കാത്ത റിപ്പോർട്ടുകളുമുണ്ട്.