ഇന്നും നാളെയും ചൂട് വലിയ അളവിൽ കൂടും; നാലു ജില്ലകളിൽ ജാഗ്രതാ നിർദേശം

തിരുവനന്തപുരം: സംസ്ഥാനത്ത് ഇന്നും നാളെയും ചൂട് വലിയ അളവില്‍ കൂടുമെന്ന് മുന്നറിയിപ്പ്. നാല് ജില്ലകളില്‍ നാല് ഡിഗ്രി സെല്‍ഷ്യസ് വരെ താപനില ഉയരുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.

തിരുവനന്തപുരം, കൊല്ലം. ആലപ്പുഴ, പാലക്കാട് ജില്ലകളിലാകും രണ്ട് മുതല്‍ നാല് ഡിഗ്രി സെല്‍ഷ്യസ് വരെ താപനില ഉയരുക.

വയനാട് ഒഴികെ ഉള്ള മറ്റു ജില്ലകളിലും ഉയര്‍ന്ന താപനില ശരാശരിയില്‍ നിന്നും 2 മുതല്‍ 3 ഡിഗ്രി സെല്‍ഷ്യസ് വരെ കൂടിയേക്കുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.

മൂന്ന് ദിവസം ചൂട് ഇതേ നിലയില്‍ തുടരുമെന്നാണ് മുന്നറിയിപ്പ്. സൂര്യാതപ, സൂര്യാഘാത സാധ്യതകൾ ഉള്ളതിനാൽ മുമ്പ് പുറപ്പെടുവിച്ച മുന്നറിയിപ്പ് നിർദ്ദേശങ്ങൾ പാലിക്കണമെന്ന് കാലാവസ്ഥാ നിരീക്ഷണകേന്ദ്രം അറിയിച്ചിട്ടുണ്ട്. രാവിലെ 11 മണിമുതൽ വൈകിട്ട് മൂന്നുമണി വരെ കുട ചൂടാതെ പുറത്തിറങ്ങരുതെന്നാണ് നിർദ്ദേശം. ഈ സമയത്ത് പുറംജോലികൾ ഒഴിവാക്കണമെന്നും അറിയിപ്പുണ്ട്.