കടും നിറങ്ങളിലുള്ള അടിവസ്ത്രം ധരിക്കുക, ശവപ്പറമ്പിൽ കിടുന്നുറങ്ങുക; പുതുവത്സരത്തിലെ രസകരമായ ആചാരങ്ങൾ

2020 പൊലൊരു വർഷം ഇനിയുണ്ടാകരുതേ എന്ന പ്രാർത്ഥനയിലായിരിക്കും ഈ ദിവസം ഭൂരിഭാഗം പേരും കിടന്നുറങ്ങുക. പതിവിൽ നിന്ന് വ്യത്യസ്തമായി പുതുവത്സ ആഘോഷങ്ങൾക്കും കടുത്ത നിയന്ത്രണങ്ങളാണ് കോവിഡിനെ തുടർന്ന് ലോക രാജ്യങ്ങളിലുള്ളത്. പുതുവത്സരം വ്യത്യസ്ത രീതിയിൽ ആഘോഷിക്കുന്ന ചില രാജ്യങ്ങളേയും അവിടങ്ങളിലെ ആഘോഷങ്ങളേയും പരിചയപ്പെടാം.

കൊളംബിയയിൽ ഡിസംബർ 31 ന് രാത്രി ക്ലോക്കിൽ 12 മണി അടിച്ചാൽ ആളുകൾ പെട്ടിയുമെടുത്ത് ഇറങ്ങി ഓടും. വീട്ടിൽ കള്ളനോ പാമ്പോ കയറിയതല്ല, വരുന്ന വർഷം മുഴുവൻ യാത്രകൾ കൊണ്ട് സമ്പന്നമാകാമെന്ന പ്രതീക്ഷയിലാണ് ഈ പാച്ചിൽ.

പുതുവർഷത്തിന്റെ തലേന്ന് പറ്റാവുന്ന അത്രയും ഭക്ഷണം കഴിക്കുകയാണ് എസ്റ്റോണിയക്കാരുടെ പ്രധാന വിനോദം. പുതിയ വർഷം സമൃദ്ധിയുടെ കാലമാകാൻ വേണ്ടിയാണ് ഏഴ് നേരം വരെയുള്ള ഭക്ഷണം കഴിപ്പ്.

കയ്യിലുള്ള പൈസയ്ക്ക് ഐസ്ക്രീമുകൾ വാങ്ങിക്കൂട്ടി അത് നിലത്ത് കളഞ്ഞാണ് സ്വിറ്റ്സർലന്റുകാർ ന്യൂ ഇയർ ആഘോഷിക്കുന്നത്. വരും വർഷം സമൃദ്ധിയുടേതാകാൻ വേണ്ടിയാണത്രേ ഈ ആചാരം.

ജപ്പാൻകാരുടെ പുതുവർഷ ആഘോഷം മണിയടിച്ചാണ്. 108 മണികൾ ഒരുമിച്ച് മുഴക്കും. ഇതോടെ അടുത്ത വർഷം വരാനിരിക്കുന്ന 108 കഷ്ടതകൾ ഇല്ലാതാകുമെന്നാണ് വിശ്വാസം. 2020 ൽ മണി അടിച്ചില്ലേ എന്ന് ചോദിക്കരുത്. 

വരാനിരിക്കുന്ന വർഷം കളർഫുൾ ആകാനായി കടും നിറങ്ങളിലുള്ള അടിവസ്ത്രങ്ങൾ ധരിച്ചാണ് ലാറ്റിൻ അമേരിക്കൻ രാജ്യങ്ങളായ ബ്രസീലിലേയും മെക്സിക്കോയിലെയും ജനങ്ങൾ പുതുവർഷത്തെ  വരവേൽക്കുന്നത്. ഓരോ നിറത്തിലുള്ള അടിവസ്ത്രത്തിനും ഓരോ അർത്ഥങ്ങളുമുണ്ട്. മഞ്ഞ നിറത്തിലുള്ള അടിവസ്ത്രമാണെങ്കിൽ സമൃദ്ധിയും വിജയവുമാണ് ആഗ്രഹിക്കുന്നത്. ചുവപ്പ് അടിവസ്ത്രം പ്രണയത്തെയാണ് സൂചിപ്പിക്കുന്നത്. വെള്ളയാണെങ്കിൽ സമാധാനവും സ്നേഹവും നിറഞ്ഞ വർഷത്തെയാണ് നിങ്ങൾ പ്രതീക്ഷിക്കുന്നത് എന്നർത്ഥം. ആരോഗ്യമുള്ള വർഷമാണ് വേണ്ടതെങ്കിൽ പച്ച നിറത്തിലുള്ള അടിവസ്ത്രം ധരിച്ചാൽ മതി.

പ്രിയപ്പെട്ടവർ അന്തിയുറങ്ങുന്ന കല്ലറകൾക്ക് സമീപം ഉറങ്ങി പുതിയ വർഷം ശവപ്പറമ്പിൽ നിന്നും ആരംഭിക്കുന്നതാണ് ചിലിയിലെ രീതി.

വീട്ടിലെ പുത്തൻ പ്ലേറ്റുകൾ എടുത്ത് മുൻവശത്തെ വാതിലിൽ എറിഞ്ഞ് പൊട്ടിച്ചാണ് ഡെന്മാർക്കിലെ ജനങ്ങളുടെ ന്യൂ ഇയർ ആഘോഷം. പ്ലേറ്റുകൾ പൊട്ടിച്ചിതറണം. കൂടുതൽ കഷ്ണങ്ങളുണ്ടായാൽ കൂടുതൽ സുഹൃത്തുക്കളെ അടുത്ത വർഷം ലഭിക്കുമത്രേ.

ദക്ഷിണാഫ്രിക്കയിൽ ഡിസംബർ 31 ന് വൈകുന്നേരം ഓരോ വീട്ടുകാരും അവരുടെ പഴയ ഫർണിച്ചർ എടുത്ത് ജനലിലൂടെ പുറത്തു കളയും. പുതിയ വർഷം പുതിയ തുടക്കം എന്നാണത്രേ ഇതുകൊണ്ട് ഉദ്ദേശിക്കുന്നത്.

സ്പെയിനിലെ ജനങ്ങൾ ആരോഗ്യപരമായിട്ടാണ് ന്യൂ ഇയർ ആഘോഷിക്കുന്നത്. 31ന് രാത്രി 12 മണിക്ക് പന്ത്രണ്ട് മുന്തിരകൾ അകത്താക്കും. ക്ലോക്കിൽ പന്ത്രണ്ട് മണികൾ മുഴങ്ങുമ്പോൾ ഓരോ മണിയിലും ഓരോ മുന്തിരി. അതാണ് രീതി. ഓരോ മുന്തിരിയും ഓരോ മാസത്തെയാണ് പ്രതിനിധീകരിക്കുന്നത്. അങ്ങനെ മന്ത്രണ്ട് മാസവും നല്ലതും മാത്രം സംഭവിക്കാനാണത്രേ ഇങ്ങനെ ചെയ്യുന്നത്.