Work from Home | വീട്ടിലിരുന്ന് ജോലി: വീട്ടിനുള്ളിൽ ഫലപ്രദമായി ജോലി ചെയ്യാൻ സുരക്ഷിതമായ 'ഓഫീസ്' എങ്ങനെ സജ്ജമാക്കാം ?
രാജ്യത്താകമാനം കോവിഡ് 19 വ്യാപിക്കുന്ന സാഹചര്യത്തില്‍ തൊഴിലാളികളോട് വീട്ടിലിരുന്ന് ജോലി ചെയ്യുന്നത് തുടരാൻ നിര്‍ദ്ദേശിച്ചിരിക്കുകയാണ് പല കമ്പനികളും. കഴിഞ്ഞ രണ്ടുമാസമായി വീട്ടിലിരുന്ന് ജോലി ചെയ്യുന്നവരാണ് നമ്മളിൽ പലരും. ഇനിയും ചിലപ്പോൾ ആഴ്ചകൾ ഈ സ്ഥിതി തുടരാനാണ് സാധ്യത. ഈ സാഹചര്യത്തിൽ വീട്ടിനുള്ളിൽ എങ്ങനെ ഒരു സുരക്ഷിത ഓഫീസ് സജ്ജമാക്കാം എന്ന് നാം അറിഞ്ഞിരിക്കണം. (ആശയം- ന്യൂസ്18 മലയാളം, ഗ്രാഫിക്സ്- ലിജു സാറ)
വീട്ടിലിരുന്ന് ജോലി ചെയ്യുന്ന രീതി ഇന്ത്യയില്‍ അത്ര പരിചിതമല്ലാത്തതുകൊണ്ടുതന്നെ എങ്ങനെ ജോലി ചെയ്യണം, ക്രമീകരണങ്ങള്‍ എങ്ങനെ നടത്തണം എന്നതിനെക്കുറിച്ച് പലര്‍ക്കും ആശങ്കകളുണ്ടാകാം. എങ്ങനെയാണ് വര്‍ക്ക് ഫ്രം ഹോം ഉപയോഗപ്പെടുത്തേണ്ടത് എന്ന് പല നിര്‍ദ്ദേശങ്ങളും ഉയരുന്നുമുണ്ട്. വീട്ടിലിരുന്നുള്ള ജോലി എളുപ്പമാക്കാന്‍ ഉപകാരപ്രദമായ ചില മാർഗങ്ങൾ ഇതാ.
ജോലിക്ക് മാനസികമായി തയാറെടുക്കുക എന്നതാണ് ഏറ്റവും പ്രധാനം. വീട്ടിലായിരിക്കുമ്പോൾ ഒപ്പം കൂടുന്ന മടി ഉപേക്ഷിക്കണം. സാധാരണ ദിവസങ്ങളിൽ ജോലിക്ക് ഓഫീസിലേക്ക് പോകുന്നതുപോലെ തന്നെ ഉറക്കമുണരുക. കുളി കഴിഞ്ഞ്, നല്ല വസ്ത്രങ്ങളൊക്കെ ധരിച്ച് ഒരുക്കങ്ങള്‍ നടത്താം. ഇത് ജോലി ചെയ്യാനുള്ള മാനസികാവസ്ഥയിലേക്ക് മാറാൻ ഉപകരിക്കും.
ഓഫീസിന് സമാനമായ അന്തരീക്ഷം ഒരുക്കിയെടുക്കുക എന്നതാണ് അടുത്തതായി ചെയ്യാവുന്നത്. കഴിയുമെങ്കില്‍ ബഹളങ്ങളില്ലാത്ത സ്ഥലം ജോലിക്കായി തെരഞ്ഞെടുക്കാം. അത് കിടപ്പുമുറി ആകാതിരിക്കുന്നതാണ് ഉചിതം. ഓഫീസിലുള്ളതിന് സമാനമായി മേശയും കസേരയും ക്രമീകരിക്കാം. സാധാരണ ദിവസം പോലെ ജോലി ചെയ്യാന്‍ പോവുകയാണ് എന്ന മാനസികാവസ്ഥയുണ്ടാക്കാന്‍ അത് സഹായിക്കും. വീഡിയോ കോളും മറ്റും ആവശ്യമുള്ള ജോലിയാണെങ്കില്‍ അതിനുള്ള പശ്ചാത്തലത്തില്‍ ഇരിപ്പിടം ക്രമീകരിക്കുന്നതായിരിക്കും നല്ലത്.
വീട്ടിലിരുന്ന് ജോലി ചെയ്യുന്നവർക്ക് എപ്പോഴും വെല്ലുവിളിയാണ് ഡാറ്റാ പാക്കേജുകൾ. വൈഫൈ ഉപയോഗിക്കുന്നവർ ഉപകരണങ്ങളെല്ലാം ശരിയായി ചാർജ് ചെയ്തുവെന്നു ഉറപ്പാക്കണം. ഇതിനായി നിങ്ങളുടെ ടെലികോം കമ്പനിയുമായോ ഇന്റര്‍നെറ്റ് പ്രൊവൈഡറുമായോ ബന്ധപ്പെടാവുന്നതാണ്. മൊബൈൽ ഫോണിൽ ഡാറ്റ കണക്ട് ചെയ്ത് ഉപയോഗിക്കുന്നവർ വർക്ക് ഫ്രം ഹോം പാക്കേജുകൾ പരീക്ഷിക്കാവുന്നതാണ്. എന്തെങ്കിലും കാരണവശാൽ വൈഫൈയെ മൊബൈൽ കണക്ഷനോ കട്ടാവുകയാണെങ്കിൽ പകരം ഒരു കണക്ഷൻ കരുതുന്നത് അടിയന്തരഘട്ടത്തിൽ ഉപകാരപ്രദമാകും.
വർക്ക് ഫ്രം ഹോമിൽ ഏറെ പ്രാധാന്യമാണ് വൈദ്യുതി കണക്ഷൻ. പ്രത്യേകിച്ച് കാലവർഷത്തിന്റെ നാളുകളിൽ വൈദ്യുതി എപ്പോൾ വരുമെന്നോ പോകുമെന്നോ പറയാൻ കഴിയില്ല. അതുകൊണ്ടുമുൻകരുതൽ സ്വീകരിക്കേണ്ടത് അത്യാവശ്യം. ലാപ്ടോപ്പുകളും മൊബൈൽ ഫോണുമെല്ലാം ചാർജ് ചെയ്ത് സൂക്ഷിക്കുക. കറണ്ട് പോയാൽ വിളിക്കാവുന്ന കെഎസിഇബി നമ്പർ അടക്കമുള്ളവ എപ്പോഴും സൂക്ഷിക്കുക.
