ചിങ്ങവനത്ത് ബസ് മറിഞ്ഞു: MC റോഡിൽ കോട്ടയത്തിനും ചങ്ങനാശേരിക്കുമിടയിൽ ഗതാഗതക്കുരുക്ക്

കോട്ടയം: ചിങ്ങവനം ജംഗ്ഷനിൽ സ്വകാര്യ ബസ് മറിഞ്ഞു. നിയന്ത്രണം വിട്ട ബസ് റോഡരികിലേക്ക് മറിഞ്ഞതിനെ തുടർന്ന് എം.സി റോഡിൽ കോട്ടയത്തിനും ചങ്ങനാശേരിക്കുമിടയിൽ രൂക്ഷമായ ഗതാഗത കുരുക്ക് അനുഭവപ്പെട്ടു.

ഇന്ന് ഉച്ചയ്ക്ക് രണ്ടുമണിയോടെ ചിങ്ങവനം സൌത്ത് ഇന്ത്യൻ ബാങ്കിനും പുത്തൻപാലത്ത് പെട്രോൾ പമ്പിനും സമീപത്തായാണ് അപകടമുണ്ടായത്. കോട്ടയത്തുനിന്ന് ചങ്ങനാശേരിയിലേക്ക് വരുകയായിരുന്ന ബസ് റോഡരികിലെ പോസ്റ്റിലിടിച്ച് തെന്നിമാറി ഓടയിലേക്ക് മറിയുകയായിരുന്നു. 

അപകടത്തിൽ 12 യാത്രക്കാർക്ക് പരുക്കേറ്റു. ഇവരെ കോട്ടയം മെഡിക്കൽ കോളേജിലും ജനറൽ ആശുപത്രിയിലുമായി പ്രവേശിപ്പിച്ചു. 

ഓടിക്കൂടിയ നാട്ടുകാരും പൊലീസും ചേർന്നാണ് ബസിനുള്ളിൽ കുടുങ്ങിയ യാത്രക്കാരെ പുറത്തെത്തിച്ചത്. അപകടത്തെ തുടർന്ന് ഇതുവഴിയുള്ള ഗതാഗതം അൽപനേരം തടസപ്പെട്ടു.