അട്ടപ്പാടിയിൽ അവശനിലയിലായിരുന്ന കാട്ടാന ചെരിഞ്ഞു; വായിൽ മുറിവേറ്റ് ചികിത്സയിലായിരുന്നു

അട്ടപ്പാടിയിൽ വായിൽ മുറിവേറ്റ് ഗുരുതരാവസ്ഥയിൽ കഴിഞ്ഞിരുന്ന കാട്ടാന ചെരിഞ്ഞു.

കഴിഞ്ഞ ഒരു മാസത്തിലേറെയായി ഭക്ഷണം കഴിക്കാനാവാതെ ഗുരുതരാവസ്ഥയിലായിരുന്ന കാട്ടാനക്ക് മയക്കുവെടിവെച്ച് ചികിത്സ നൽകിയിരുന്നുവെങ്കിലും ആരോഗ്യം വീണ്ടെടുക്കാനായിരുന്നില്ല.

ഇന്ന് രാവിലെ ഏഴു മണിയോടെയാണ് കാട്ടാന ചരിഞ്ഞത്. തമിഴ്നാട് വനമേഖലയിൽ നിന്നും വായിൽ മുറിവേറ്റ് ഗുരുതരാവസ്ഥയിലായ കാട്ടാന ആഗസ്ത് 17നാണ് അട്ടപ്പാടിയിലെ ആനക്കട്ടി മേഖലയിലെത്തുന്നത്.

നാവ് മുറിഞ്ഞ് വായിൽ ഗുരുതരമുറിവുള്ള കാട്ടാനയ്ക്ക് ആഗസ്റ്റ് 22 ന് മയക്കുവെടിവെച്ച് ചികിത്സ നൽകിയിരുന്നു. എന്നാൽ രോഗാവസ്ഥയ്ക്ക് ഒരു മാറ്റവും ഉണ്ടായില്ല.

കാട്ടാന വീണ്ടും തമിഴ്നാട് വനമേഖലയിലേക്ക് പോയ കാട്ടാന ഈ മാസം ആറിന് അട്ടപ്പാടി ആനക്കട്ടി മേഖലയിലേക്ക് എത്തി. വെള്ളം പോലും ഇറക്കാനാവാതെ അതീവ ഗുരുതരാവസ്ഥയിലായ കാട്ടാന ഇന്ന് രാവിലെ ചെരിഞ്ഞു.

എന്നാൽ ആനയ്ക്ക് വായിൽ എങ്ങനെയാണ് പരിക്കേറ്റത് എന്നതിനെക്കുറിച്ച് ഇപ്പോഴും കാരണം വ്യക്തമല്ല. തമിഴ്നാട് - കേരള വനം വകുപ്പ് ഉദ്യോഗസ്ഥർ ഇക്കാര്യത്തിൽ അന്വേഷണം തുടരുകയാണ്.

മാസങ്ങളായി അട്ടപ്പാടിയിൽ ഉണ്ടായിരുന്ന കാട്ടാന നിരവധി വീടുകളും കൃഷിസ്ഥലവും നശിപ്പിച്ചിരുന്നു. പരിക്കേറ്റതിന് ശേഷവും വീടുകൾ തകർത്തിട്ടുണ്ട്.