Petrol And Diesel Prices Hike |ഇന്ധന വില കുതിച്ചുയരുന്നു; കാളവണ്ടി സമരം നടത്തി ബസുടമകൾ

ഇന്ധനവില കുതിച്ചുയരുന്ന സാഹചര്യത്തിൽ ബസ് ചാർജ് വർധിപ്പിക്കണമെന്ന ആവശ്യവുമായി കാളവണ്ടി സമരം നടത്തി ബസ്സുടമകൾ.

ഇന്നും ഡീസലിനും പെട്രോളിനും വില വർധിച്ചു. പതിനാറ് ദിവസത്തിനുള്ളിൽ ഡീസലിന് 8 .99 രൂപയും പെട്രോളിന് 8.35 രൂപയുമാണ് വർധിച്ചത്.

ഈ സാഹചര്യത്തിലാണ് ബസുടമകൾ പാലക്കാട്  കാളവണ്ടി സമരം നടത്തിയത്.

സിവിൽ സ്റ്റേഷന് മുന്നിൽ നിന്നും പാലക്കാട് ഹെഡ് പോസ്റ്റ് ഓഫീസിലേയ്ക്ക് കാളവണ്ടി ഓടിച്ചാണ് പ്രതിഷേധം സംഘടിപ്പിച്ചത്.

വലിയ പ്രതിസന്ധിയാണ് നേരിടുന്നതെന്ന് ബസ് ഓപ്പറേറ്റേഴ്സ് ഓർഗനൈസേഷൻ ജനറൽ സെക്രട്ടറി ടി. ഗോപിനാഥൻ പറഞ്ഞു. 

മറ്റു ജില്ലകളിലും പ്രതിഷേധം സംഘടിച്ചിട്ടുണ്ടെന്ന് ബസുടമകൾ വ്യക്തമാക്കി.

സർവ്വീസുകൾ കനത്ത നഷ്ടത്തിലാണെന്നും ബസ് ചാർജ് വർധിപ്പിയ്ക്കണമെന്നും ഇവർ ആവശ്യപ്പെട്ടു.

ഈ മാസം തീരുമാനമായില്ലെങ്കിൽ ജൂലൈ ഒന്നുമുതൽ സർവ്വീസുകൾ നിർത്തിവെക്കേണ്ടി വരുമെന്നും ഇവർ വ്യക്തമാക്കി.