Virat Kohli| ആയിരം കോടിക്ക് മുകളിൽ ആസ്തിയോ? ക്രിക്കറ്റ് ലോകത്തെ അതി സമ്പന്നനായി കോഹ്ലി

ലോകത്തിലെ തന്നെ ഏറ്റവും പോപ്പുലറായ കായിക താരങ്ങളുടെ പട്ടികയിൽ നമ്മുടെ സ്വന്തം വിരാട് കോഹ്ലിയും ഉണ്ട്. ഇൻസ്റ്റഗ്രാമിൽ കൂടുതൽ ഫോളോവേഴ്സ് ഉള്ള ക്രിക്കറ്റ് താരവുമാണ് കോഹ്ലി. 252 മില്യൺ ആളുകളാണ് കോഹ്ലിയെ ഇൻസ്റ്റഗ്രാമിൽ ഫോളോ ചെയ്യുന്നത്.

ലോകത്തിലെ അതി സമ്പന്നരായ കായിക താരങ്ങളുടെ പട്ടികയിലും ഇന്ത്യൻ ക്രിക്കറ്റ് താരം ഇടംപിടിച്ചു കഴിഞ്ഞു. വിരാട് കോഹ്ലിയുടെ ആസ്തി ആയിരം കോടിക്കു മുകളിലാണെന്നാണ് ഏറ്റവും പുതിയ റിപ്പോർട്ടുകൾ.

കൃത്യമായി പറഞ്ഞാൽ 1,050 കോടിയാണ് കോഹ്ലിയുടെ ആസ്തി. നിലവിൽ അന്താരാഷ്ട്ര ക്രിക്കറ്റ് താരങ്ങളിൽ തന്നെ ഏറ്റവും സമ്പന്നൻ കോഹ്ലിയാണ്.

ബിസിസിഐയുടെ A+ ടീം കരാർ പ്രകാരം മാത്രം 7 കോടിയാണ് കോഹ്ലിക്ക് ലഭിക്കുന്നത്. ഓരോ ടെസ്റ്റ് മത്സരത്തിലും അദ്ദേഹത്തിന് ലഭിക്കുന്ന മാച്ച് ഫീ 15 ലക്ഷം രൂപയാണ്. ഏകദിനത്തിൽ നിന്ന് 6 ലക്ഷവും ടി20 യിൽ 3 ലക്ഷം രൂപയുമാണ് കോഹ്ലിയുടെ മാച്ച് ഫീ.

റോയൽ ചലഞ്ചേഴ്‌സ് ബാംഗ്ലൂരുമായുള്ള ഐപിഎൽ കരാറിൽ നിന്ന് പ്രതിവർഷം 15 കോടി രൂപയും ലഭിക്കുന്നു. ഇതിനെല്ലാം പുറമേ, നിരവധി ബ്രാൻഡുകളിലും നിന്നും സ്റ്റാർട്ട് അപ്പുകളിൽ നിന്നും കോടികളാണ് കോഹ്ലിയുടെ വരുമാനം.

നിലവിൽ 18 ഓളം ബ്രാൻഡുകൾക്കൊപ്പമാണ് കോഹ്ലി സഹകരിക്കുന്നത്. ഇതിന്റെയെല്ലാം പരസ്യ ചിത്രീകരണത്തിൽ നിന്നും 7.50 മുതൽ 10 കോടി രൂപ വരെയാണ് താരം ഈടാക്കുന്നത്

കായിക ലോകത്ത് മാത്രമല്ല, ബോളിവുഡിൽ പോലും ബ്രാൻഡ് എൻഡോർസസിലൂടെ ഇത്രയും പണം സമ്പാദിക്കുന്ന മറ്റൊരു താരം ഇന്ത്യിൽ ഇല്ല. ബ്രാൻഡ് എൻഡോർസ്മെന്റിലൂടെ മാത്രം 175 കോടി രൂപയാണ് കോഹ്ലിയുടെ വരുമാനം.

ഇനി സോഷ്യൽ മീഡിയയിലേക്ക് വന്നാൽ, ഇൻസ്റ്റഗ്രാമിൽ ഒരു പോസ്റ്റിന് 8.9 കോടി രൂപയും ട്വിറ്ററിൽ 2.5 കോടിയുമാണ് വിരാട് കോഹ്ലിയുടെ ചാർജ്.

ഇതിനെല്ലാം പുറമേ, മുംബൈയിൽ 34 കോടി രൂപയുടെ വസതി, ഗുരുഗ്രാമിൽ 80 കോടി മൂല്യമുള്ള വീടും താരത്തിനുണ്ട്. 31 കോടിയോളം വില മതിക്കുന്ന ആഢംബര കാറുകളുടെ ശേഖരവുമുണ്ട്. ക്രിക്കറ്റിനു പുറത്ത്, എഫ്സി ഗോവ, ഒരു ടെന്നീസ് ടീം, പ്രോ-ഗുസ്തി ടീമിന്റേയും ഉടമ കൂടിയാണ് നമ്മുടെ വിരാട് കോഹ്ലി