PM Modi in Germany| പ്രധാനമന്ത്രി നരേന്ദ്ര മോദിക്ക് ബെർലിനിൽ ഉജ്ജ്വല സ്വീകരണം; ജർമൻ ചാൻസലർ ഒലാഫ് ഷോൾസുമായി കൂടിക്കാഴ്ച നടത്തും

മൂന്ന് ദിവസത്തെ യൂറോപ്പ് പര്യടനത്തിന്റെ ഭാഗമായി പ്രധാനമന്ത്രി നരേന്ദ്ര മോദി (Narendra Modi) ജർമനിയുടെ തലസ്ഥാനമായ ബെർലിനിൽ (Berlin)എത്തി. കുറച്ച് സമയത്തിന് ശേഷം അദ്ദേഹം ബെർലിനിൽ നടക്കുന്ന ഇന്ത്യ-ജർമ്മനി ഐജിസി യോഗത്തിൽ പങ്കെടുക്കും. തുടർന്ന് ജർമൻ ചാൻസലർ ഒലാഫ് ഷോൾസുമായി അദ്ദേഹം കൂടിക്കാഴ്ച നടത്തും.

 വൈകുന്നേരം ജർമനിയിലെ വിദേശ ഇന്ത്യക്കാരെ അദ്ദേഹം അഭിസംബോധന ചെയ്യും. മേയ് മൂന്നിന് ബെർലിനിൽ നിന്ന് പ്രധാനമന്ത്രി ഡെൻമാർക്കിന്റെ തലസ്ഥാനമായ കോപ്പൻഹേഗനിലെത്തും.

ബർലിൻ വിമാനത്താവളത്തിൽ പ്രധാനമന്ത്രി നരേന്ദ്ര മോദിക്ക് ഊഷ്മള സ്വീകരണമാണ് ലഭിച്ചത്. വിമാനത്താവളത്തിൽ അദ്ദേഹത്തിന് ഗാർഡ് ഓഫ് ഓണർ നൽകി.

വെല്ലുവിളികൾക്കിടയിലും ഈ സന്ദർശനം വളരെ പ്രധാനപ്പെട്ടതാണെന്ന് പ്രധാനമന്ത്രി മോദി പറഞ്ഞു. ഈ സന്ദർശനത്തിൽ, ഇന്ത്യയുടെ സമാധാനവും സമൃദ്ധിയും എന്ന ലക്ഷ്യത്തിന്റെ പ്രധാന ഭാഗമായ എല്ലാ സഹപ്രവർത്തകരെയും ഞങ്ങൾ കാണും- അദ്ദേഹം പറഞ്ഞു.

ഇന്ത്യയുടെ ഇന്റർ ഗവൺമെന്റൽ കൺസൾട്ടേഷൻ (ഐജിസി) ജർമ്മനിയുമായി മാത്രമാണ്, ഇത് രണ്ട് വർഷത്തിലൊരിക്കൽ നടക്കുന്നു. ആറാം ഐജിസിക്ക് ശേഷം ഉന്നതതല വട്ടമേശ യോഗം നടക്കും. പ്രധാനമന്ത്രിയും ചാൻസലർ ഷോൾസും ഇരു രാജ്യങ്ങളിലെയും ഉന്നത ഉദ്യോഗസ്ഥരുമായി ചർച്ച നടത്തും.