ടീത്ത് വൈറ്റനിങ്ങിനു ശേഷം അതിന്റെ ചിത്രം മകന് അയച്ചുകൊടുക്കാനായി ഒരു ഫോട്ടോ എടുത്തപ്പോഴാണ് പൗളിൻ തന്റെ ചുണ്ടിലെ പാട് ആദ്യമായി ശ്രദ്ധിച്ചത്. എന്നാൽ അതിനും മുൻപേ, ഈ ട്യൂമർ അകത്ത് വളരുന്നുണ്ടായിരുന്നു എന്നും പുറത്ത് ഈ പാട് കണ്ടപ്പോൾ മാത്രമാണ് താൻ അത് ശ്രദ്ധിച്ചതെന്നും ഇവർ മാധ്യമങ്ങളോട് പറഞ്ഞു. ആദ്യം ഇതൊരു കറുത്ത പാടായിരുന്നു എന്നും പിന്നീട് രാവിലെ എഴുന്നേൽക്കുന്ന സമയങ്ങളിൽ അതിൽ രക്തം കാണാൻ തുടങ്ങിയെന്നും പൗളിൻ കൂട്ടിച്ചേർത്തു.
advertisement
പൗളിന്റെ ഡെർമറ്റോളജിസ്റ്റ് 2020 നവംബറിൽ നടത്തിയ ബയോപ്സി പരിശോധനക്കു ശേഷമാണ് സ്കിൻ കാൻസർ സ്ഥിരീകരിച്ചത്. “അന്ന് ഞങ്ങൾ സ്പെയിനിൽ ആയിരുന്നു. ഏഴു വർഷത്തിനിടെ ആദ്യമായി ഞങ്ങളുടെ മൂന്ന് മക്കളും ഞങ്ങളോടൊപ്പം ഒന്നിച്ച് സ്പെയിനിലെ വീട്ടിൽ ഉണ്ടായിരുന്ന സമയമായിരുന്നു അത്. അവരോട് ഇക്കാര്യം പറയാൻ ഞാൻ ആഗ്രഹിച്ചില്ല,” പോളിൻ പറഞ്ഞു.
പൗളിന്റെ ചുണ്ടിലെ കാൻസർ താടിയിലേക്ക് പടർന്നതായി വിശദമായ പരിശോധനയിൽ കണ്ടെത്തി. അത് ഉടൻ ശസ്ത്രക്രിയയിലൂടെ നീക്കം ചെയ്യണമെന്ന് ഡോക്ടർമാർ പോളിനോട് പറഞ്ഞു. നാവിലെ ചില ഭാഗങ്ങൾ ചുണ്ടിൽ വെച്ചുപിടിപ്പിക്കാനും സർജൻ നിർദേശിച്ചു.
വിശദമായ ബയോപ്സി പരിശോധനയിൽ പോളിന്റെ ചുണ്ടിലെ ട്യൂമറിൽ ഒരു പദാർത്ഥം കണ്ടെത്തിയിരുന്നു. അത് ലിപ് ഫില്ലിങ്ങിനായി ഉപയോഗിച്ച വസ്തു ആണെന്നും ഡോക്ടർമാർ കണ്ടെത്തി. പോളിൻ നാല് തവണ ലിപ് ഫില്ലിങ്ങ് നടത്തിയിരുന്നു. ഫില്ലറിൽ ഉപയോഗിച്ച ഒരു പദാർത്ഥമാണ് ട്യൂമറിന് കാരണമായതെന്നും ഡോക്ടർമാർ പറഞ്ഞു.
പിന്നീട് വളരെ സങ്കീർണമായ ശസ്ത്രക്രിയക്കാണ് പൗളിന് വിധേയയാകേണ്ടി വന്നത്. ചുണ്ടിലെ ട്യൂമർ നീക്കം ചെയ്ത ശേഷം, ഡോക്ടർ പൗളിന്റെ നാവ് നീളത്തിൽ മുറിച്ച്, ചുണ്ടുകളുടെ ആകൃതിയിൽ തുന്നിക്കെട്ടി. ശസ്‌ത്രക്രിയയ്‌ക്ക്‌ ശേഷം, മൂന്നാഴ്‌ചയോളം പൗളിൻ ദ്രവരൂപത്തിലുള്ള ഭക്ഷണങ്ങൾ മാത്രമാണ് കഴിച്ചിരുന്നത്. രാത്രിയിൽ അസഹനീയമായ വേദന അനുഭവപ്പെട്ടിരുന്നതായും പൗളിൻ പറയുന്നു.
“അത് കോവിഡ് സമയം ആയിരുന്നു. എല്ലാവരും മാസ്ക് ധരിച്ചിരുന്നതിനാൽ എന്റെ ആത്മവിശ്വാസത്തെ അത് കാര്യമായി ബാധിച്ചില്ല”, പൗളിൻ പറഞ്ഞു. എന്നാൽ 2022 നവംബറിൽ ഇംഗ്ലണ്ടിൽ തിരിച്ചെത്തിയപ്പോൾ എല്ലാവരും മാസ്ക് മാറ്റിത്തുടങ്ങിയിരുന്നു എന്നും അപ്പോൾ ചെറിയ അപകർഷതാബോധം തോന്നിയിരുന്നു എന്നും പൗളിൻ കൂട്ടിച്ചേർത്തു. മെഡിക്കൽ ടാറ്റൂ ചെയ്യുന്ന ഒരു ആർട്ടിസ്റ്റാണ് പിന്നീട് തന്റെ സഹായത്തിന് എത്തിയതെന്നും അവർ കൂട്ടിച്ചേർത്തു.