'ഒരുപാട് നാളുകൾക്ക് ശേഷം ഞാൻ അവളെ കണ്ടപ്പോൾ സമയം പോലും നിശ്ചലമായി'; മകളെ കുറിച്ച് വൈകാരിക കുറിപ്പുമായി ക്രിക്കറ്റർ ഷമി

ഇപ്പോഴിതാ ഏറെ നാളുകൾക്ക് ശേഷം തന്റെ മകളെ കണ്ടിരിക്കുകയാണ് ഷമി. തൻ്റെ മകളെ കണ്ട വീഡിയോ പങ്കിട്ടതിനൊപ്പം താരം കുറിച്ച വികാരഭരിതമായ കുറിപ്പ് സോഷ്യൽ മീഡിയയിൽ ശ്രദ്ധയാവുകയാണ്. മകൾ ഐറയ്ക്കൊപ്പം ഷോപ്പിംഗ് മാളിൽ പോകുന്ന ഉൾപ്പെടെയുള്ള കാര്യങ്ങൾ അടങ്ങുന്ന ഒരു റീലാണ് താരം പങ്കുവെച്ചത്. അച്ഛനും മകളും ഒരുമിച്ച് ഷോപ്പിംഗ് നടത്തുന്നതും വീഡിയോയിൽ കാണാം.

"വളരെ നാളുകൾക്ക് ശേഷം ഞാൻ അവളെ വീണ്ടും കണ്ടപ്പോൾ സമയം നിശ്ചലമായി. വാക്കുകൾക്ക് പറയാൻ കഴിയുന്നതിനേക്കാൾ നിന്നെ സ്നേഹിക്കുന്നു, ബെബോ," ഷമി ഇൻസ്റ്റാഗ്രാമിൽ കുറിച്ചു. ഒരു മണിക്കൂറിനുള്ളിൽ 1.60 ലക്ഷം ലൈക്കുകളാണ് പോസ്റ്റിന് ലഭിച്ചത്. 2018 ലാണ് മുഹമ്മദ് ഷമിയും ഐറയുടെ മാതാവായ ഹസിൻ ജഹാനും തമ്മിൽ വേർപിരിഞ്ഞത്.