ഇന്‍ഡോര്‍ സ്വദേശിയായ രാകേഷ് അഗര്‍വാളിന് കീഴില്‍ ജോലി ചെയ്യുകയായിരുന്നു ദുര്‍ഗേഷ്. രാകേഷിന് ഒരു റേഞ്ച് റോവര്‍ കാറുണ്ട്. തിങ്കളാഴ്ച രാവിലെ ദുര്‍ഗേഷ് കാറിന്റെ താക്കോല്‍ രാകേഷില്‍ നിന്നും വാങ്ങി. കാര്‍ വൃത്തിയാക്കാനെന്നു പറഞ്ഞാണ് ഇയാള്‍ രാകേഷില്‍ നിന്ന് താക്കോല്‍ വാങ്ങിയത്.
ദുര്‍ഗേഷിനെ വിശ്വസിച്ച രാകേഷ് കാറിന്റെ താക്കോല്‍ നല്‍കി. എന്നാല്‍ കാര്‍ വൃത്തിയാക്കാന്‍ കൂട്ടാക്കാതെ ദുര്‍ഗേഷ് ഈ ആഡംബര കാറോടിച്ച് തന്റെ ഭാര്യയെ കാണാനായി വീട്ടിലേക്ക് പോയി.
നേരം വൈകിയിട്ടും ഡ്രൈവറിനെ കാണാതായതോടെ രാകേഷ് പോലീസ് സ്റ്റേഷനില്‍ പരാതി നല്‍കി. ദുര്‍ഗേഷ് മോഷ്ടിച്ച കാറില്‍ ജിപിഎസ് സംവിധാനം ഘടിപ്പിച്ചിരുന്നു. അതുപയോഗിച്ച് പോലീസ് കാര്‍ ട്രാക്ക് ചെയ്തു.
advertisement
മോഷണം നടന്ന് ആറ് മണിക്കൂറിനുള്ളില്‍ തന്നെ പോലീസ് കാര്‍ കണ്ടെത്തി. ഡ്രൈവറായ ദുര്‍ഗേഷ് രാജ്പുത്തിനെ പോലീസ് അറസ്റ്റ് ചെയ്യുകയും ചെയ്തു. തുടര്‍ന്ന് സ്ഥലത്തെത്തിയ ഇന്‍ഡോറില്‍ നിന്നുള്ള പോലീസ് സംഘം പ്രതിയില്‍ നിന്നും കാര്‍ കണ്ടെത്തുകയും ചെയ്തു. പിന്നീട് നടത്തിയ ചോദ്യം ചെയ്യലില്‍ തന്റെ ഭാര്യയെ സന്തോഷിപ്പിക്കുന്നതിനായാണ് കാര്‍ മോഷ്ടിച്ചതെന്ന് ദുര്‍ഗേഷ് പോലീസിനോട് പറഞ്ഞു.