മണിയൻപിള്ള രാജു വിൻ്റെ മകൻ നിരഞ്ജ് സഞ്ചരിച്ച വാഹനത്തിൽ കെഎസ്ആർടിസി ബസിടിച്ചു

സിനിമയുടെ പ്രൊമോഷൻ പരിപാടികൾക്കായി യാത്ര ചെയ്യവേ നിരഞ്ജും സംഘവും സഞ്ചരിച്ചിരുന്ന വാഹനത്തിൽ കെഎസ്ആർടിസി ബസ് ഇടിക്കുകയായിരുന്നു. വളവ് തിരിയുന്നതിനിടെ ബസ് വന്ന് കാറിൽ ഇടിക്കുകയായിരുന്നുവെന്ന് നിരഞ്ജ് പറഞ്ഞു. ഭാഗ്യം കൊണ്ടാണ് താരവും സംഘവും പരിക്കേൽക്കാതെ രക്ഷപ്പെട്ടത്. വാഹനത്തിന് കാര്യമായ കേടുപാടുകൾ സംഭവിച്ചെങ്കിലും താൻ സുരക്ഷിതനാണെന്ന് സിനിമാ പ്രൊമോഷനിടെ നിരഞ്ജ് തന്നെ മാധ്യമങ്ങളോട് വ്യക്തമാക്കി.

'ആവാസവ്യൂഹം', 'പുരുഷപ്രേതം', 'ഗഗനചാരി' എന്നീ ചിത്രങ്ങളിലൂടെ ശ്രദ്ധേയനായ കൃഷാന്ദ് സംവിധാനം ചെയ്യുന്ന പുതിയ ചിത്രമാണ് 'മസ്തിഷ്ക മരണം'. അജിത് വിനായക ഫിലിംസിന്റെ ബാനറിൽ വിനായക അജിത് നിർമ്മിക്കുന്ന ഈ ചിത്രം സയൻസ് ഫിക്ഷൻ വിഭാഗത്തിലാണ് ഉൾപ്പെടുന്നത്. സിനിമയുടെ പ്രൊമോഷൻ തിരക്കുകൾക്കിടയിലാണ് അപകടം നടന്നത്.

advertisement

ഏതാനും ദിവസങ്ങൾക്ക് മുൻപ് നിരഞ്ജിന്റെ പിതാവും നടനുമായ മണിയൻപിള്ള രാജു സഞ്ചരിച്ച വാഹനവും അപകടത്തിൽപ്പെട്ടിരുന്നു. തിരുവനന്തപുരത്ത് വെച്ച് അദ്ദേഹം സഞ്ചരിച്ചിരുന്ന കാർ ബൈക്കിലിടിച്ച് രണ്ട് യുവാക്കൾക്ക് പരിക്കേൽക്കുകയായിരുന്നു. അപകടത്തിന് ശേഷം വാഹനം നിർത്താതെ പോയതും പിന്നീട് ഭയം കാരണമാണ് നിർത്താതിരുന്നതെന്ന് അദ്ദേഹം വ്യക്തമാക്കിയതും വാർത്തകളിൽ ഇടം പിടിച്ചിരുന്നു. ഇതിന് പിന്നാലെയാണ് ഇപ്പോൾ മകൻ നിരഞ്ജിന്റെ വാഹനവും അപകടത്തിൽപ്പെടുന്നത്.