'സിഖ് വിരുദ്ധ മനോഭാവം'; രവ്നീത് ബിട്ടുവിനെ 'ചതിയൻ' എന്ന് വിളിച്ച രാഹുൽ ഗാന്ധിക്കെതിരെ പ്രധാനമന്ത്രി മോദി

"ഇന്നലെ കോൺഗ്രസിന്റെ രാജകുമാരൻ ഒരു എംപിയെ 'ചതിയൻ' എന്ന് വിളിച്ചു. അവരുടെ അഹങ്കാരം പുതിയ ഉയരങ്ങളിലെത്തിയിരിക്കുന്നു. എത്രയോ പേർ കോൺഗ്രസ് വിട്ടുപോയിട്ടുണ്ട്. കോൺഗ്രസ് പലതവണ വിഭജിക്കപ്പെട്ടു, പല നേതാക്കളും മറ്റ് പാർട്ടികളിലേക്ക് പോയി. അവരെയൊന്നും ഇവർ ചതിയനെന്ന് വിളിച്ചില്ല. എന്നാൽ ബിട്ടുവിനെ ചതിയൻ എന്ന് വിളിച്ചത് അദ്ദേഹം ഒരു സിഖുകാരനായതുകൊണ്ടാണ്," മോദി പറഞ്ഞു.

ഇത് എല്ലാ സിഖുകാരെയും അപമാനിക്കലാണെന്നും സിഖ് സമൂഹത്തോടുള്ള കോൺഗ്രസിന്റെ ആഴത്തിലുള്ള വിദ്വേഷമാണ് ഇതിലൂടെ പ്രകടമാകുന്നതെന്നും പ്രധാനമന്ത്രി കൂട്ടിച്ചേർത്തു. രാജ്യത്തിനായി ത്യാഗം ചെയ്ത കുടുംബത്തിലെ അംഗമാണ് ബിട്ടു എന്നും രാഷ്ട്രീയം മാറിയതിന്റെ പേരിൽ ഒരാൾ എങ്ങനെ 'ചതിയൻ' ‌ആകുമെന്നും അദ്ദേഹം ചോദിച്ചു.

advertisement

‌രാഹുൽ ഗാന്ധിയുടെ പരാമർശം

ബുധനാഴ്ച സസ്പെൻഡ് ചെയ്യപ്പെട്ട എംപിമാർക്കൊപ്പം ഫോട്ടോയ്ക്ക് പോസ് ചെയ്യുന്നതിനിടെയാണ് സംഭവം. മുൻ കോൺഗ്രസ് എംപി കൂടിയായ ബിട്ടു ആ വഴി പോയപ്പോൾ "ഇവർ കാർഗിൽ യുദ്ധം ജയിച്ചു വരികയാണെന്ന് തോന്നുന്നു" എന്ന് പരിഹസിച്ചു. ഇതിന് മറുപടിയായാണ് "ഒരു ചതിയൻ ഇതാ കടന്നുപോകുന്നു" എന്ന് രാഹുൽ പറഞ്ഞത്. പിന്നീട് ബിട്ടുവിനെ അരികിലേക്ക് വിളിച്ച് "കണ്ടോളൂ, ഒരു ചതിയൻ‌ ഇങ്ങനെയിരിക്കും" എന്ന് പറയുകയും കൈ കൊടുക്കാൻ ശ്രമിക്കുകയും ചെയ്തു. എന്നാൽ ബിട്ടു അത് നിരസിക്കുകയും രാഹുലിനെ 'രാജ്യത്തിന്റെ ശത്രു' എന്ന് വിളിക്കുകയും ചെയ്തു.

രാഷ്ട്രീയ വിവാദം

രാഹുലിന്റെ പരാമർശം മര്യാദയുടെ എല്ലാ അതിർവരമ്പുകളും ലംഘിച്ചുവെന്ന് കേന്ദ്രമന്ത്രി ഹർദീപ് സിംഗ് പുരി പറഞ്ഞു. എന്നാൽ കോൺഗ്രസ് എല്ലാം നൽകിയിട്ടും ബിട്ടു ബിജെപിയിലേക്ക് പോയതിനെയാണ് രാഹുൽ വിമർശിച്ചതെന്ന് കോൺഗ്രസ് നേതാക്കൾ പ്രതിരോധിച്ചു.

പ്രസംഗത്തിലുടനീളം കോൺഗ്രസിനെ കടന്നാക്രമിച്ച പ്രധാനമന്ത്രി, കോൺഗ്രസ് രാഷ്ട്രപതി ദ്രൗപതി മുർമുവിനെയും ദളിത് വിഭാഗങ്ങളെയും വടക്കുകിഴക്കൻ സംസ്ഥാനങ്ങളിലെ ജനങ്ങളെയും അപമാനിച്ചതായും ആരോപിച്ചു. ആന്ധ്രപ്രദേശിൽ നിന്നുള്ള ഒരു ദളിത് കുടുംബത്തിലെ അംഗം സഭ നിയന്ത്രിക്കുമ്പോൾ അദ്ദേഹത്തെയും കോൺഗ്രസ് അപമാനിച്ചുവെന്ന് മോദി കുറ്റപ്പെടുത്തി.