കരാർ ജോലി നഷ്ടപ്പെടാതിരിക്കാൻ മുൻ സൈനികൻ ഭീകരാക്രമണ പദ്ധതി കെട്ടിച്ചമച്ചു

ഭീകരാക്രമണത്തെക്കുറിച്ച് ആദ്യം വിവരം നൽകിയ  മുഷ്താഖ് അലി തന്നെയാണ് ഇതിന്റെ പിന്നിലെ സൂത്രധാരനെന്ന് പോലീസ് കണ്ടെത്തുകയായിരുന്നു.കൃത്യമായ അന്വേഷണത്തിലൂടെയാണ് ഈ ചതി പുറത്തുകൊണ്ടുവരാൻ കഴിഞ്ഞതെന്ന് ഡിസിപി ഡോ. ജഗദീഷ് ചാവ്ദ പറഞ്ഞു. ഡെഡിക്കേറ്റഡ് ഫ്രൈറ്റ് കോറിഡോറിന് സമീപം സ്ഫോടകവസ്തുക്കൾ കണ്ടെത്തിയത് ദേശീയ അന്വേഷണ ഏജൻസികളെപ്പോലും ജാഗ്രതയിലാക്കിയിരുന്നു.

തന്റെ ഭാവി സുരക്ഷിതമാക്കാനുള്ള ആഗ്രഹമാണ് സയീദിനെ ഇത്തരമൊരു പ്രവർത്തിക്ക് പ്രേരിപ്പിച്ചതെന്ന് പോലീസ് അന്വേഷണത്തിൽ തെളിഞ്ഞു. 2024 മുതൽ 2026 വരെയുള്ള കാലയളവിലേക്കായിരുന്നു ഇയാളുടെ കരാർ. കാലാവധി കഴിയുന്നതോടെ ജോലി നഷ്ടപ്പെടുമെന്ന് ഇയാൾ ഭയപ്പെട്ടിരുന്നു. വലിയ അപകടങ്ങൾ ഒഴിവാക്കുകയോ പ്രശംസനീയമായ രീതിയിൽ ജോലി ചെയ്യുകയോ ചെയ്യുന്ന റെയിൽവേ ജീവനക്കാർക്ക് കരാർ നീട്ടിക്കൊടുക്കുകയോ സ്ഥിരം നിയമനം നൽകുകയോ ചെയ്യാറുണ്ട് എന്ന അറിവാണ് ഒരു 'ലോക്കൽ ഹീറോ' ആകാൻ സയീദിനെ ഇത്തരമൊരു അപകടകരമായ നാടകത്തിന് പ്രേരിപ്പിച്ചത്.

advertisement

ട്രാക്കിൽ കണ്ടെത്തിയ സ്ഫോടകവസ്തുക്കൾ വിവാഹങ്ങൾക്കും മറ്റും ഉപയോഗിക്കുന്ന 'കോൾഡ് പൈറോ' എന്ന ഇലക്ട്രിക് പടക്കങ്ങളാണെന്ന് പൊലീസ് തിരിച്ചറിഞ്ഞു. അടുത്തുള്ള ഒരു വിവാഹ ചടങ്ങിൽ നിന്ന് സംഘടിപ്പിച്ച ഇവ ട്രാക്കിൽ സ്ഥാപിച്ച ശേഷം, താൻ അത് കണ്ടെത്തിയതായി മുഷ്താഖ് അലി അധികൃതരെ അറിയിക്കുകയായിരുന്നു. ജീവനും സ്വത്തും രക്ഷിച്ച ഒരു ജാഗ്രതയുള്ള ഉദ്യോഗസ്ഥനായി സ്വയം ചിത്രീകരിക്കാനായിരുന്നു ഇയാളുടെ ശ്രമം.

യഥാർത്ഥത്തിൽ നാശനഷ്ടങ്ങൾ ഒന്നും സംഭവിച്ചില്ലെങ്കിലും, റെയിൽവേ ട്രാക്കിൽ വസ്തുക്കൾ വെച്ച് ഭീഷണി സൃഷ്ടിച്ചതിന് ജീവനും സ്വത്തിനും ഭീഷണിയുണ്ടാക്കിയെന്ന ഗൗരവകരമായ കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്. റെയിൽവേയുടെ സുരക്ഷയുമായി ബന്ധപ്പെട്ട വിഷയമായതിനാൽ ദേശീയ അന്വേഷണ ഏജൻസികളും ഈ കേസിൽ പങ്കുചേർന്നിട്ടുണ്ട്.