കൂറുമാറുന്ന എംഎൽഎമാർക്ക് പെൻഷനില്ല; നിയമവുമായി ഹിമാചൽ പ്രദേശ് സർക്കാർ

ഭരണഘടനയുടെ പത്താം ഷെഡ്യൂൾ (കൂറുമാറ്റ നിരോധന നിയമം) പ്രകാരം അയോഗ്യരാക്കപ്പെടുന്ന 14-ാം നിയമസഭയിലെയോ അതിനുശേഷമുള്ളതോ ആയ അംഗങ്ങൾക്ക് പെൻഷന് അർഹതയുണ്ടായിരിക്കില്ല. നിലവിലുള്ള 1971-ലെ നിയമത്തിൽ പുതിയ ഉപവകുപ്പ് (2-എ) ചേർത്താണ് ഈ മാറ്റം കൊണ്ടുവരുന്നത്. ജനവിധി അട്ടിമറിച്ച് പാർട്ടി മാറുന്ന പ്രവണത തടയാനും ജനാധിപത്യ മൂല്യങ്ങൾ സംരക്ഷിക്കാനുമാണ് ഈ നീക്കമെന്ന് സർക്കാർ വ്യക്തമാക്കി.

നിലവിലെ പെൻഷൻ രീതി

നിലവിൽ അഞ്ച് വർഷം കാലാവധി തികയ്ക്കുന്ന എംഎൽഎമാർക്ക് പ്രതിമാസം 50,000 രൂപയാണ് പെൻഷൻ. ഓരോ അധിക വർഷത്തിനും 1,000 രൂപ വീതം വർധനവുണ്ടാകും. പുതിയ നിയമം വരുന്നതോടെ പാർട്ടി മാറി അയോഗ്യരാക്കപ്പെടുന്നവർക്ക് ഈ തുക ലഭിക്കില്ല.

advertisement

ആർക്കൊക്കെ ആനുകൂല്യം നഷ്ടമാകും?

2024-ലെ രാജ്യസഭാ തിരഞ്ഞെടുപ്പിൽ ക്രോസ് വോട്ട് ചെയ്തതിനെത്തുടർന്ന് കോൺഗ്രസിൽ നിന്ന് അയോഗ്യരാക്കപ്പെട്ട ആറ് എംഎൽഎമാരിൽ ചൈതന്യ ശർമ്മ, ദേവേന്ദ്ര കുമാർ ഭൂട്ടോ എന്നിവർക്ക് പുതിയ നിയമം തിരിച്ചടിയാകും. ഇവർ ആദ്യമായി എംഎൽഎമാരായവരാണ്. മറ്റ് നാല് പേർ മുൻപ് 12, 13 നിയമസഭകളിൽ അംഗങ്ങളായിരുന്നതിനാൽ ആ കാലയളവിലെ പെൻഷന് അർഹരായിരിക്കും.

നിയമസഭ പാസാക്കുന്ന ബിൽ ഗവർണർ ഒപ്പിടുന്നതോടെ നിയമമായി മാറും. രാഷ്ട്രീയ ധാർമ്മികത ഉറപ്പാക്കാനും സാമ്പത്തികമായ ആഘാതം വഴി കൂറുമാറ്റം തടയാനും ഈ നിയമം സഹായിക്കുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.

Summary: The Himachal Pradesh government, led by CM Sukhvinder Singh Sukhu, has introduced a landmark bill to penalize lawmakers who defect. Under the Assembly Allowances and Pension Amendment Bill, 2026, any MLA disqualified under the anti-defection law (Tenth Schedule) will be stripped of their pension and permanent benefits. The move aims to uphold the public mandate and deter legislators from switching parties for political gain. While veteran defectors may retain pensions from previous terms, first-time MLAs disqualified for cross-voting will face immediate financial consequences upon the bill’s enactment.