വന്ദേ ഭാരത് ട്രെയിനുകളുടെ പ്രധാന ഹബ് ആയി ഈ ദക്ഷിണേന്ത്യൻ നഗരം

ബംഗളൂരുവിൽ നിന്ന് സർവീസ് ആരംഭിക്കുന്ന വന്ദേ ഭാരത് ട്രെയിനുകളുടെ ലിസ്റ്റ് അടങ്ങുന്ന ഒരു വീഡിയോ ഇപ്പോൾ ഓൺലൈനിൽ പ്രചരിക്കുന്നുണ്ട്. ഒരു ഇൻസ്റ്റഗ്രാം ഉപയോക്താവാണ് ഈ വീഡിയോ പങ്കിട്ടിരിക്കുന്നത്. ഇതിൽ ട്രെയിനിന്റെ പേര്, സഞ്ചരിച്ച ദൂരം, എടുത്ത സമയം എല്ലാം കൃത്യമായി വിശദീകരിക്കുന്നുണ്ട്.

ബംഗളൂരുവിൽ നിന്ന് സർവീസ് നടത്തുന്ന വന്ദേ ഭാരത് ട്രെയിനുകളെ കുറിച്ച് അറിയാം...

* മധുര വന്ദേ ഭാരത് 

ഈ ട്രെയിൻ ഉച്ചയ്ക്ക് 1.30ന് ബംഗളൂരു കന്റോൺമെന്റിൽ നിന്ന് പുറപ്പെടും. സേലം, നാമക്കൽ, കരൂർ, തിരുച്ചിറപ്പള്ളി, ഡിണ്ടിഗൽ എന്നിവിടങ്ങളിലൂടെ കടന്നുപോകുന്ന ട്രെയിൻ രാത്രി 8.40ന് മധുരയിൽ എത്തുന്നു. ഏകദേശം 580 കിലോമീറ്റർ ദൂരം സഞ്ചരിക്കുന്ന ട്രെയിൻ യാത്രയ്ക്ക് 8 മണിക്കൂർ എടുക്കുന്നു. മറ്റ് ട്രെയിൻ സർവീസുകളേക്കാൾ വളരെ വേഗത്തിലുള്ള ബദൽ മാർഗ്ഗമാണിത്.

advertisement

* കോയമ്പത്തൂർ വന്ദേ ഭാരത് 

ഈ ട്രെയിൻ ബംഗളൂരു കന്റോൺമെന്റിൽ നിന്ന് ഉച്ചയ്ക്ക് 2.20-ന് ആരംഭിക്കുന്നു. ഹൊസൂർ, ധർമ്മപുരി, സേലം, ഈറോഡ്, തിരുപ്പൂർ വഴി ഓടുന്ന ഈ ട്രെയിൻ രാത്രി 8.40ന് കോയമ്പത്തൂരിലെത്തും. ഏകദേശം ആറ് മണിക്കൂർ 20 മിനിറ്റിനുള്ളിൽ 380 കിലോമീറ്റർ ദൂരം ഓടിയെത്തും.

* കേരളത്തെയും ബംഗളൂരുവിനെയും ബന്ധിപ്പിക്കുന്ന വന്ദേ ഭാരത്

കേരളവും ബംഗളൂരുവും തമ്മിലുള്ള കണക്റ്റിവിറ്റി ശക്തമാക്കുന്നത് എറണാകുളം വന്ദേ ഭാരത് ആണ്. കെഎസ്ആർ ബംഗളൂരുവിൽ നിന്ന് പുലർച്ചെ 5.10-ന് പുറപ്പെടുന്ന ട്രെയിൻ സേലം, ഈറോഡ്, തിരുപ്പൂർ, കോയമ്പത്തൂർ, പാലക്കാട്, തൃശൂർ വഴി സഞ്ചരിച്ച് ഉച്ചയ്ക്ക് 1.50ന് എറണാകുളത്ത് എത്തും. ഏകദേശം എട്ട് മണിക്കൂർ 40 മിനുറ്റിനുള്ളിൽ 638 കിലോമീറ്റർ ദൂരം ഓടും.

* ധാർവാഡ് വന്ദേ ഭാരത് 

കെഎസ്ആർ ബംഗളൂരുവിൽ നിന്ന് ട്രെയിൻ രാവിലെ ആറ് മണിക്ക് ആരംഭിക്കുന്ന ട്രെയിൻ യശ്വന്തപൂർ, തുമകുരു, ദാവണഗെരെ, ഹാവേരി, ഹുബ്ബള്ളി എന്നിവിടങ്ങളിലൂടെ സഞ്ചരിച്ച് ഉച്ചയ്ക്ക് 12.25ന് ധാർവാഡിൽ എത്തിച്ചേരും. ആറ് മണിക്കൂർ 25 മിനുറ്റ്‌കൊണ്ട് 500 കിലോമീറ്റർ സഞ്ചരിക്കും.

* ബെലഗാവി വന്ദേ ഭാരത് 

ഉച്ചയ്ക്ക് 2.20ന് കെഎസ്ആർ ബംഗളൂരുവിൽ നിന്ന് പുറപ്പെടുന്നു. ഇത് ഏതാണ്ട് സമാന സ്റ്റേഷനുകളിലൂടെ സഞ്ചരിച്ച് ധാർവാഡ് കടന്ന് രാത്രി 10.40ന് ബെലഗാവിയിൽ എത്തുന്നു. ഏകദേശം എട്ട് മണിക്കൂർ 20 മിനിറ്റിനുള്ളിൽ 610 കിലോമീറ്റർ സഞ്ചരിക്കുന്നു.

* കലബുറഗി വന്ദേ ഭാരത് 

രാവിലെ 5:15ന് ബംഗളൂരുവിലെ എസ്എംവിടിയിൽ നിന്ന് പുറപ്പെട്ട് യലങ്ക, അനന്തപൂർ, ഗുണ്ടക്കൽ, മന്ത്രാലയം, റായ്ച്ചൂർ, യാദഗിരി എന്നിവിടങ്ങളിലൂടെ കടന്ന് ഉച്ചയ്ക്ക് 1.45ന് കലബുറഗിയിൽ എത്തിച്ചേരുന്നു, ഏകദേശം 8 മണിക്കൂർ 30 മിനിറ്റിനുള്ളിൽ 550 കിലോമീറ്റർ സഞ്ചരിക്കുന്നു.

* കച്ചെഗുഡ വന്ദേ ഭാരത് 

ഈ സർവീസ് ഹൈദരാബാദിനെയും ബംഗളൂരുവിനെയും ബന്ധിപ്പിക്കുന്നു. യശ്വന്ത്പൂർ ബംഗളൂരുവിൽ നിന്ന് ഉച്ചയ്ക്ക് 2.45ന് പുറപ്പെട്ട് ശ്രീ സത്യസായി പ്രശാന്തി നിലയം, ധർമ്മവാരം, അനന്തപൂർ വഴി കുർണൂൽ, മഹ്ബൂബ്‌നഗർ വഴി സഞ്ചരിച്ച് രാത്രി 11.15ന് കാച്ചെഗുഡയിൽ എത്തിച്ചേരുന്നു. 610 കിലോമീറ്റർ 8 മണിക്കൂർ 30 മിനിറ്റ് കൊണ്ട് പൂർത്തിയാക്കും.