'തന്തയില്ലാത്തവൻ' വിളി ക്രിമിനൽ കുറ്റമല്ല; അശ്ലീലവുമല്ല: സുപ്രീം കോടതി

ഐപിസി 294-ാം വകുപ്പ് പ്രകാരം ഒരു പ്രവൃത്തി കുറ്റകരമാകണമെങ്കിൽ, ഉപയോഗിച്ച വാക്കുകളിൽ ലൈംഗികമായ അർത്ഥങ്ങളോ കാമചിന്തകൾ ഉണർത്തുന്ന പരാമർശങ്ങളോ ഉണ്ടായിരിക്കണം. വെറുപ്പോ ഞെട്ടലോ ഉളവാക്കുന്ന ഭാഷ ഉപയോഗിച്ചു എന്നതുകൊണ്ട് മാത്രം അത് അശ്ലീലത്തിന്റെ പരിധിയിൽ വരില്ല. 'അശ്ലീലം' എന്ന വാക്ക് ഐപിസിയിൽ കൃത്യമായി നിർവചിച്ചിട്ടില്ലെങ്കിലും, മുൻ വിധികൾ പ്രകാരം ലൈംഗിക വികാരങ്ങൾ ഉണർത്തുന്ന കാര്യങ്ങളെയാണ് ഈ ഗണത്തിൽ പെടുത്തിയിട്ടുള്ളത്.

ആധുനിക കാലഘട്ടത്തിൽ കടുത്ത തർക്കങ്ങൾക്കിടയിൽ ഇത്തരം വാക്കുകൾ സാധാരണയായി ഉപയോഗിക്കാറുണ്ട്. 'ബാസ്റ്റാർഡ്' എന്ന വാക്ക് ഉപയോഗിച്ചു എന്നതുകൊണ്ട് മാത്രം ഒരാളിൽ അവിഹിതമായ താൽപ്പര്യങ്ങൾ ഉണരില്ല. അതിനാൽ, ഐപിസി സെക്ഷൻ 294(ബി) പ്രകാരം ഇതിനെ ശിക്ഷാർഹമായ കുറ്റമായി കാണാൻ കഴിയില്ലെന്ന് കോടതി വ്യക്തമാക്കി.

advertisement

അതിർത്തി തർക്കത്തെ ചൊല്ലിയുള്ള ഒരു കുടുംബ സ്വത്ത് തർക്കത്തിനിടെ, പ്രതി മരിച്ചയാളെ ഈ വാക്ക് ഉപയോഗിച്ച് അധിക്ഷേപിച്ചതാണ് കേസിനാസ്പദമായ സംഭവം. ഇത് അശ്ലീലമാണെന്ന വാദം സുപ്രീം കോടതി തള്ളി. അധിക്ഷേപകരമായ ഭാഷ ഉപയോഗിക്കുന്നത് മാന്യമല്ലെങ്കിലും, അത് നിയമത്തിന്റെ കണ്ണിൽ അശ്ലീലമായ കുറ്റകൃത്യമായി നിലനിൽക്കില്ലെന്ന് കോടതി നിരീക്ഷിച്ചു.