27 പന്തില്‍ നാല് ഫോറും രണ്ട് സിക്‌സറുമടക്കം 48 റണ്‍സുമായി കളി ആര്‍ സി ബിക്ക് അനുകൂലമാക്കിയത് ഡി വില്ലിയേഴ്‌സായിരുന്നു. അന്താരാഷ്ട്ര ക്രിക്കറ്റില്‍ നിന്ന് നേരത്തെ വിരമിച്ച താരം അഞ്ച് മാസത്തിലേറെയായി യാതൊരു മത്സരങ്ങളും കളിച്ചിരുന്നില്ല. ഇപ്പോഴിതാ ഡി വില്ലിയേഴ്‌സിനെ വാനോളം പ്രശംസിച്ചുകൊണ്ട് മുന്‍ ഇന്ത്യന്‍ വെടിക്കെട്ട് ഓപ്പണര്‍ വീരേന്ദര്‍ സെവാഗ്. സേവാഗ് മാത്രമല്ല ക്രിക്കറ്റ് ഇതിഹാസങ്ങളായ മാത്യു ഹെയ്ഡൻ, ബ്രയാൻ ലാറ എന്നിവരും അദ്ദേഹത്തിന് അഭിനന്ദനങ്ങൾ അറിയിച്ചു.
ഡി വില്ലിയേഴ്സിന്റെ ഷോട്ട് കണ്ടിട്ട് രഹസ്യമായാണ് ഐ പി എല്‍ ലോഗോ രൂപകല്‍പ്പന ചെയ്തതെന്നാണ് സെവാഗ് അഭിപ്രായപ്പെട്ടത്. മനക്കരുത്ത് എന്നത് ഡിവില്ലിയേഴ്‌സാണെന്നും അത് എല്ലാ കരുത്തിനെക്കാളും മുകളിലാണെന്നും സെവാഗ് ട്വിറ്ററില്‍ കുറിച്ചു.
advertisement
ട്രെന്റ് ബോള്‍ട്ടിന്റെ ഒരു നക്കിള്‍ ബോള്‍ പിക്ക് ചെയ്തു പേസ് ജനറേറ്റ് ചെയ്തു ഡി വില്ലിയേഴ്സ് അതിര്‍ത്തി കടത്തിയത് ആരാധകർക്ക് വിസ്മയ വിരുന്നാണ് ഒരുക്കിയത്. ബുമ്രക്ക് പോലും പെര്‍ഫെക്റ്റ് യോര്‍ക്കര്‍ എന്ന ഓപ്ഷന്‍ അല്ലാതെ വേറൊരു ഓപ്ഷന്‍ ഇല്ലാത്ത വിധം വിനാശകാരിയായി തുടരുകയാണ് ഡി വില്ലിയേഴ്സ് ഇപ്പോഴും. ബാംഗ്ലൂരിന്റെ മാക്സ്വെൽ, കോഹ്ലി ലൈൻ അപ്പിൽ ഫിനിഷർ സ്ഥാനത്ത് ഡി വില്ലിയേഴ്സ് ചേരുന്നതോടെ എതിരാളികൾക്ക് സമ്മർദം കൂടുകയാണ്.
177ന് മുകളില്‍ സ്‌ട്രൈക്ക് റേറ്റില്‍ ബാറ്റുവീശിയ എ ബി ഡി മുംബൈ ബൗളര്‍മാരെ കടന്നാക്രമിക്കുകയായിരുന്നു. ഒടുവില്‍ ദൗര്‍ഭാഗ്യകരമായ റണ്ണൗട്ട് സംഭവിച്ചില്ലായിരുന്നെങ്കില്‍ ഐ പി എല്‍ 14ആം സീസണിലെ ആദ്യ അര്‍ധ സെഞ്ച്വറി ഡി വില്ലിയേഴ്സ് സ്വന്തമാക്കുമായിരുന്നു. 37ആം വയസിലും തന്റെ പ്രതിഭ നിലനിര്‍ത്താന്‍ കഴിയുന്ന എ ബി ഡിക്ക് സമൂഹമാധ്യമങ്ങളിൽ അഭിനന്ദന പ്രവാഹമാണ്.
News summary: Impressed by AB De Villiers’ batting genius, Sehwag by a tweet said that the IPL logo is designed on De Villiers himself.