മൈലാഞ്ചിമൊഞ്ചോടെ നിറഞ്ഞ പുഞ്ചിരിയുമായ് മണവാട്ടിയും തോഴിമാരും വേദിയില്‍ എത്തിയപ്പോള്‍ കാണികളിലും സന്തോഷം വിടര്‍ന്നു. തെല്ലും ആശങ്കയില്ലാതെ കൈകൊട്ടി ഒപ്പനയുടെ ചുവടുകള്‍ വച്ചു. അമ്മമാരുടെ വിരല്‍ത്തുമ്പില്‍ കൈകോര്‍ത്ത് വേദിയില്‍ കയറാന്‍ നില്‍ക്കുന്നവര്‍, അണിഞ്ഞൊരിങ്ങി നാണത്തോടെ ഫോട്ടോയെടുക്കാന്‍ നില്‍ക്കുന്നവര്‍ എന്നിങ്ങനെ കണ്ണിന് മിഴിവേകുന്ന നിരവധി കൗതുക കാഴ്ചകള്‍.
തലശ്ശേരി നഗരസഭ കോടിയേരി ബാലകൃഷ്ണന്‍ സ്മാരക ടൗണ്‍ ഹാളില്‍ രണ്ടുദിവസങ്ങളിലായി നടന്ന താലോലം 2024 ല്‍ പഴശ്ശിരാജാ മെമ്മോറിയല്‍ ബഡ്സ് സ്പെഷ്യല്‍ സ്‌കൂള്‍ മട്ടന്നൂര്‍ ചാമ്പ്യന്മാരായി. 48 പോയിൻ്റുകള്‍ നേടിയാണ് ഒന്നാംസ്ഥാനം സ്വന്തമാക്കിയത്. ജില്ലയിലെ 32 ബഡ്സ് സ്‌കൂളുകളില്‍നിന്നായി 270 കലാകാരന്മാരാണ് മത്സരിച്ചത്. സ്‌കൂള്‍ കലോത്സവത്തിലെ മത്സരങ്ങളിലെ പോലെ തന്നെ വാശി നിറച്ചാണ് ബഡ്സ് കലോത്സവ വേദിയില്‍ കുരുന്നുകള്‍ പരസ്പരം മാറ്റുരച്ചത്.
advertisement