'ഡാഷ് മോനേ രേവന്താ... മറുപടി പിന്നാലെ വരുന്നുണ്ട്'; തെലങ്കാന മുഖ്യമന്ത്രി രേവന്ത് റെഡ്ഡിക്കെതിരെ മുഖ്യമന്ത്രി പിണറായി വിജയൻ

തിരുവനന്തപുരത്ത് യുഡിഎഫ് സ്ഥാനാർത്ഥി കെ.എസ്. ശബരീനാഥന്റെ തിരഞ്ഞെടുപ്പ് പ്രചാരണത്തിന് എത്തിയപ്പോഴാണ് രേവന്ത് റെഡ്ഡി പിണറായി വിജയനെതിരെ സിനിമ സ്റ്റൈലിൽ വെല്ലുവിളി ഉയർത്തിയത്. മോഹൻലാൽ ചിത്രത്തിലെ പ്രശസ്തമായ "നീ പോ മോനേ വിജയാ" എന്ന ഡയലോഗ് അനുകരിച്ചുകൊണ്ട് പിണറായി വിജയന്റെ 'എക്സ്പയറി ഡേറ്റ്' കഴിഞ്ഞുവെന്നും കേരളത്തിൽ ഉടൻ യുഡിഎഫ് അധികാരം പിടിക്കുമെന്നും രേവന്ത് റെഡ്ഡി റോഡ് ഷോയ്ക്കിടെ പരിഹസിച്ചിരുന്നു.

ഇതിന് വാർത്താസമ്മേളനത്തിലൂടെയും സോഷ്യൽ മീഡിയയിലൂടെയും ശക്തമായ ഭാഷയിലാണ് മുഖ്യമന്ത്രി മറുപടി നൽകിയത്. സ്വന്തം നാട്ടിൽ ശമ്പളവും പെൻഷനും കൃത്യമായി നൽകാൻ പോലും കഴിയാത്ത ഒരു സർക്കാരിനെ നയിക്കുന്ന മുഖ്യമന്ത്രിയിൽ നിന്ന് കേരളത്തിന് ഒന്നും പഠിക്കാനില്ലെന്ന് പിണറായി വിജയൻ തിരിച്ചടിച്ചു. കേരളത്തില്‍ നിന്നും രേവന്ത് റെഡ്ഡിക്കാണ് ഭരണനിര്‍വഹണത്തിന്റെ പാഠങ്ങള്‍ പഠിക്കാനുള്ളത്. ജനക്ഷേമ മാതൃകകളെക്കുറിച്ച് പഠിക്കാന്‍ തെലങ്കാന മുഖ്യമന്ത്രിയെ കേരളത്തിലേക്ക് സ്വാഗതം ചെയ്യുന്നുവെന്നും മുഖ്യമന്ത്രി സമൂഹമാധ്യമത്തില്‍ കുറിച്ചിരുന്നു.

advertisement

ഭരണനിർവഹണത്തിന്റെ പാഠങ്ങൾ രേവന്ത് റെഡ്ഡി കേരളത്തിൽ നിന്നാണ് പഠിക്കേണ്ടതെന്നും ജനക്ഷേമ മാതൃകകൾ മനസ്സിലാക്കാൻ അദ്ദേഹത്തെ കേരളത്തിലേക്ക് സ്വാഗതം ചെയ്യുന്നുവെന്നും മുഖ്യമന്ത്രി പറഞ്ഞു.

തന്നെ സംവാദത്തിന് വെല്ലുവിളിച്ച രേവന്ത് റെഡ്ഡിക്ക് കൃത്യമായ മറുപടി ഉടൻ നൽകുമെന്നും അദ്ദേഹം കൂട്ടിച്ചേർത്തു. സിനിമ ഡയലോഗുകളും വ്യക്തിപരമായ കടന്നാക്രമണങ്ങളും നിറഞ്ഞ ഈ വാക്പോര് കേരള-തെലങ്കാന മുഖ്യമന്ത്രിമാർക്കിടയിൽ  രാഷ്ട്രീയ പോരാട്ടത്തിനാണ് വഴിയൊരുക്കിയിരിക്കുന്നത്.