സ്മാർട്ടായി കൊല്ലം: വിപ്ലവകരമായ പദ്ധതികളുമായി 2026–27 കൊല്ലം കോർപ്പറേഷൻ ബജറ്റ്

ചിന്നക്കടയിലെ ഗതാഗതക്കുരുക്ക് പരിഹരിക്കാൻ റെയിൽവേ സ്റ്റേഷൻ മുതൽ താലൂക്ക് ഓഫീസ് വരെ നീളുന്ന എലിവേറ്റഡ് ഫ്ലൈഓവർ നിർമാണം ബഡ്ജറ്റിലെ പ്രധാന പ്രഖ്യാപനമാണ്. നഗര റോഡുകൾ വിശാലമാക്കുകയും സൗന്ദര്യവൽക്കരണം നടപ്പാക്കുകയും ചെയ്യുമെന്ന് അധികൃതർ അറിയിച്ചു.

നഗരവാസികൾക്ക് 24 മണിക്കൂർ ശുദ്ധമായ കുടിവെള്ള വിതരണം ഉറപ്പാക്കുന്ന പ്രത്യേക പദ്ധതി ബഡ്ജറ്റിൽ ഉൾപ്പെടുത്തി. മാലിന്യ സംസ്കരണത്തിനായി ആധുനിക സാങ്കേതിക വിദ്യയും പുതിയ അറവുശാലകളും ഒരുക്കുന്നതിലൂടെ ശുചിത്വ പ്രശ്നങ്ങൾക്ക് ശാശ്വത പരിഹാരം കാണാൻ ശ്രമം നടക്കും. നഗരം മുഴുവൻ LED തെരുവ് വിളക്കുകൾ സ്ഥാപിക്കും. ലൈറ്റുകൾ കേടായാൽ ഓൺലൈൻ പരാതി സംവിധാനത്തിലൂടെ വേഗത്തിൽ പരിഹരിക്കുന്ന സംവിധാനവും നടപ്പാക്കും.

advertisement

വിദ്യാർത്ഥികളെ ബിരുദതലത്തിലേക്ക് എത്തിക്കാൻ ലക്ഷ്യമിടുന്ന വിദ്യാഭ്യാസ പദ്ധതികൾക്കും യുവജനങ്ങൾക്ക് തൊഴിൽ അവസരങ്ങൾ സൃഷ്ടിക്കുന്ന സംരംഭങ്ങൾക്കും മുൻഗണന നൽകുന്നു. വന്ധ്യംകരണവും സംരക്ഷണ പദ്ധതികളും വഴി തെരുവുനായ ശല്യം കുറയ്ക്കാനും പൊതുജനങ്ങളുടെ സുരക്ഷ ഉറപ്പാക്കാനും നടപടികൾ സ്വീകരിക്കും. ഒറ്റപ്പെടുന്ന വയോജനങ്ങൾക്ക് വിശ്രമ കേന്ദ്രങ്ങൾ സ്ഥാപിക്കുന്ന പദ്ധതിയും സാമൂഹിക ക്ഷേമ പദ്ധതികളുടെ ഭാഗമാണ്.

ചരിത്ര സ്മാരകങ്ങൾ സംരക്ഷിച്ച് വിനോദസഞ്ചാര മേഖലയിൽ കൊല്ലത്തെ ശക്തിപ്പെടുത്തും. മത്സ്യത്തൊഴിലാളികൾക്കായി 'ഫിഷർമെൻ സപ്പോർട്ട് സെൽ' ആരംഭിക്കുന്നതും ബഡ്ജറ്റിൽ ഉൾപ്പെടുത്തിയിട്ടുണ്ട്. കുടുംബശ്രീ യൂണിറ്റുകൾക്ക് സ്റ്റാർട്ടപ്പ് പിന്തുണയും സ്ത്രീകളുടെ ആരോഗ്യ കേന്ദ്രങ്ങളും ഉൾപ്പെടുത്തി സ്ത്രീശക്തീകരണത്തിന് പ്രത്യേക പരിഗണന നൽകിയിട്ടുണ്ട്. സമഗ്ര വികസന കാഴ്ചപ്പാടോടെ അവതരിപ്പിച്ച ഈ ബഡ്ജറ്റ് കൊല്ലത്തിൻ്റെ ഭാവി വളർച്ചയ്ക്ക് നിർണായകമാകുമെന്ന പ്രതീക്ഷയിലാണ് നഗരവാസികൾ.