TRENDING:
അവയവമാറ്റ ആശുപത്രിയിലൂടെ സമാനതകളില്ലാത്ത സ്ഥാപനമാണ് യാഥാര്ഥ്യമാകുന്നത്. ആരോഗ്യരംഗത്ത് ഒട്ടേറെ മാറ്റങ്ങള് സംഭവിച്ചുകൊണ്ടിരിക്കുന്ന കാലത്ത് ഏറ്റവും പ്രധാനമാണ് അവയവമാറ്റ ശസ്ത്രക്രിയകള്. സ്വകാര്യ മേഖലയില് വന് തുകയാണ് ഇതിന് ചെലവാകുന്നത്. ഒരേ ശസ്ത്രക്രിയക്ക് തന്നെ വലിയ ചിലവുകളാണുണ്ടാകാറുള്ളത്. പല കുടുംബങ്ങള്ക്കും ഇത് താങ്ങാനാവുന്നില്ല. ഇത് പരിഗണിച്ചാണ് വിദഗ്ധരില്നിന്ന് ഇങ്ങനെയൊരു ആശുപത്രിക്കുള്ള നിര്ദേശം വരുന്നത്. ആശുപത്രി സമയബന്ധിതമായി പൂര്ത്തീകരിക്കാനാവുമെന്നാണ് പ്രതീക്ഷ. ഇതിന് എല്ലാവരുടെയും പിന്തുണ വേണമെന്നും മുഖ്യമന്ത്രി അഭ്യര്ഥിച്ചു.
കേരളത്തിൻ്റെ ആരോഗ്യ മേഖലയുടെ ചരിത്രത്തില് നാഴികക്കല്ലാകുന്ന ദിവസമാണിതെന്ന് ചടങ്ങില് അധ്യക്ഷതവഹിച്ച ആരോഗ്യ വകുപ്പ് മന്ത്രി വീണ ജോര്ജ് പറഞ്ഞു. രാജ്യത്ത് ഇതുവരെ ഒരു അവയവമാറ്റ ആശുപത്രിയോ ഗവേഷണ കേന്ദ്രമോ ഇല്ലാത്തതിനാല് അതിൻ്റെ ആവശ്യകത മനസ്സിലാക്കിയാണ് സംസ്ഥാന സര്ക്കാര് ചേവായൂരില് കേരള ഇന്സ്റ്റിറ്റ്യൂട്ട് ഓഫ് ഓര്ഗന് ട്രാന്സ്പ്ലാൻ്റേഷന് സ്ഥാപിക്കുന്നത്. വലിയ ചികിത്സാ ചെലവ് വരുന്ന അവയവ മാറ്റത്തിന് ആശുപത്രി യാഥാര്ഥ്യമാകുന്നതോടെ കുറഞ്ഞ ചെലവില് അത്യാധുനിക സൗകര്യങ്ങള് ലഭ്യമാകും. അവയവമാറ്റം കഴിഞ്ഞ രോഗികള്ക്ക് രാജ്യത്തെ ഏറ്റവും കുറഞ്ഞ വിലയില് മരുന്നുകള് ലഭ്യമാക്കാനുള്ള പ്രഖ്യാപനവും സര്ക്കാര് ഉടന് നടത്തുമെന്നും മന്ത്രി പറഞ്ഞു.
advertisement
ശാസ്ത്ര, ഗവേഷണ, ചികിത്സാ മേഖലയില് കഴിഞ്ഞ പത്ത് വര്ഷത്തിനിടെ കേരളത്തിലുണ്ടായ മാറ്റം കണ്ണഞ്ചിപ്പിക്കുന്നതാണ്. ചികിത്സയുമായി ബന്ധപ്പെട്ട വലിയ സാമ്പത്തിക പ്രതിസന്ധിയില്നിന്ന് സാധാരണക്കാരെ ചേര്ത്തുപിടിച്ചാണ് സര്ക്കാര് മുന്നേറുന്നത്. ആര്ദ്രം മിഷന് നടപ്പാക്കിയതോടെ കേരളത്തിലെ താലൂക്ക് ആശുപത്രികളില് ഡയാലിസിസ് സെൻ്ററുകള് സ്ഥാപിക്കാന് സര്ക്കാറിന് സാധിച്ചു. 12 ആശുപത്രികളില് മാത്രമായിരുന്ന ഡയാലിസിസ് സൗകര്യം ഇപ്പോള് 125 കേന്ദ്രങ്ങളിലായെന്നും മന്ത്രി കൂട്ടിച്ചേര്ത്തു.
ചടങ്ങില് പൊതുമരാമത്ത്-ടൂറിസം വകുപ്പ് മന്ത്രി പി എ മുഹമ്മദ് റിയാസ്, എം കെ രാഘവന് എംപി, മേയര് ഒ സദാശിവന്, എംഎല്എമാരായ തോട്ടത്തില് രവീന്ദ്രന്, അഹമ്മദ് ദേവര്കോവില്, കെ കെ രമ, ജില്ലാ കലക്ടര് സ്നേഹില് കുമാര് സിങ്, മെഡിക്കല് വിദ്യാഭ്യാസ ഡയറക്ടര് ഡോ. കെ വി വിശ്വനാഥന്, ഗവ. മെഡിക്കല് കോളേജ് പ്രിന്സിപ്പല് കെ ജി സജിത്ത് കുമാര്, ഡിഎംഒ ഡോ. കെ കെ രാജാറാം, ആരോഗ്യ കേരളം ഡി.പി.എം. സി കെ ഷാജി, കേരള ഇന്സ്റ്റിറ്റ്യൂട്ട് ഓഫ് ഓര്ഗന് ട്രാന്സ്പ്ലാൻ്റേഷന് സ്പെഷ്യല് ഓഫീസര് ഡോ. ബിജു പൊറ്റക്കാട്ട് തുടങ്ങിയവര് പങ്കെടുത്തു.
ചേവായൂരിലെ ത്വക്ക് രോഗ ആശുപത്രി വളപ്പിലെ 20 ഏക്കര് സ്ഥലത്താണ് രാജ്യത്തെ ആദ്യ അവയവമാറ്റ ആശുപത്രി സ്ഥാപിക്കുന്നത്. രണ്ടു ഘട്ടങ്ങളിലായി നിര്മിക്കുന്ന ആശുപത്രിയുടെ ആദ്യഘട്ട പ്രവൃത്തികള്ക്ക് 299 കോടി രൂപയാണ് ചെലവ്. ഇതിന് പുറമെ ഉപകരണങ്ങള്ക്കായി 99 കോടി രൂപയും നീക്കിവെച്ചിട്ടുണ്ട്. ആദ്യ ഘട്ടത്തില് ഐ.സി.യു., എച്ച്.ഡി.യു. സൗകര്യങ്ങള്, ഡയാലിസിസ് സെൻ്റര്, 10 ഓപറേഷന് തിയേറ്ററുകള് എന്നിവ ഉള്പ്പെടെ 350 കിടക്കകളുണ്ടാകും. 14 സ്പെഷ്യാലിറ്റി ഡിപ്പാര്ട്ട്മെൻ്റുകളും ഡിവിഷനുകളും ഉണ്ടാകും. എട്ട് നിലകളിലായാണ് നിര്മാണം. ട്രാന്സ്പ്ലാൻ്റേഷന് മേഖലയിലെ ഡോക്ടര്മാര്ക്കും പാരാമെഡിക്കല് ജീവനക്കാര്ക്കുമുള്ള പരിശീലന കേന്ദ്രമായും ഗവേഷണ കേന്ദ്രമായും ഇത് പ്രവര്ത്തിക്കും. 31 അക്കാദമിക് കോഴ്സുകള്ക്കും പദ്ധതിയുണ്ട്.
അവയവമാറ്റ ശസ്ത്രക്രിയയുമായി ബന്ധപ്പെട്ട എല്ലാ പ്രവര്ത്തനങ്ങളും എല്ലാതരം അവയവ മാറ്റ ശസ്ത്രക്രിയകളും ഒരു കുടക്കീഴില് കൊണ്ടുവരിക എന്ന ലക്ഷ്യത്തോടെയാണ് അത്യാധുനിക സൗകര്യങ്ങളോടെ ഇന്സ്റ്റിറ്റ്യൂട്ട് സ്ഥാപിക്കുന്നത്. കിഫ്ബി ഫണ്ട് ഉപയോഗിച്ചാണ് ആശുപത്രിയുടെ നിര്മാണം.
Click here to add News18 as your preferred news source on Google.