'മമ്മൂട്ടിക്കുപോലും കാണണം എന്നു തോന്നുന്ന മഹത്തായ മാതൃക’; സൈബറാക്രമണത്തെ തള്ളി മന്ത്രി രാജീവ്

മുണ്ടക്കൈ-ചൂരൽമല ടൗൺഷിപ്പ് സന്ദർശിക്കാൻ മമ്മൂട്ടി കാണിച്ച മനസ്സിനെ മന്ത്രി അഭിനന്ദിച്ചു. "ഇത്രയും തിരക്കുകൾക്കിടയിലും വയനാട്ടിലെത്തി ആ പദ്ധതി കാണണമെന്ന് അദ്ദേഹത്തിന് തോന്നിയത് വലിയൊരു മാതൃകയാണ്. അദ്ദേഹം അവിടെയെത്തിയതോടെ ടൗൺഷിപ്പ് പദ്ധതിയെക്കുറിച്ച് ലോകം കൂടുതൽ അറിഞ്ഞു. വികസനത്തെക്കുറിച്ചും പെരുമ്പളം പാലത്തെക്കുറിച്ചും അദ്ദേഹം പറഞ്ഞ വാക്കുകൾ അങ്ങേയറ്റം പ്രസക്തമാണ്," പി. രാജീവ് വ്യക്തമാക്കി. മമ്മൂട്ടിയുടെ സന്ദർശനത്തിന് അദ്ദേഹം പ്രത്യേക നന്ദിയും രേഖപ്പെടുത്തി.

ശനിയാഴ്ച ഉച്ചയ്ക്ക് ടൗൺഷിപ്പ് സന്ദർശനത്തിനിടെ സി.പി.എം വയനാട് ജില്ലാ സെക്രട്ടറി കെ. റഫീഖിനോട് മമ്മൂട്ടി നീരസം പ്രകടിപ്പിച്ചെന്ന തരത്തിലുള്ള വീഡിയോ പ്രചരിച്ചതോടെയാണ് സൈബർ ആക്രമണം തുടങ്ങിയത്. സാമൂഹിക മാധ്യമങ്ങളിൽ ഈ ദൃശ്യങ്ങൾ വ്യാപകമായി പ്രചരിക്കുകയും വിമർശനങ്ങൾ ഉയരുകയും ചെയ്തിരുന്നു. ഈ പശ്ചാത്തലത്തിലാണ് മമ്മൂട്ടിക്ക് പിന്തുണയുമായി മന്ത്രി രംഗത്തെത്തിയത്.

advertisement