സംസ്ഥാനത്ത് രണ്ട് വാഹനാപകടങ്ങളിലായി ആറ് യുവാക്കൾ മരിച്ചു; രണ്ട് പേർ ഗുരുതരാവസ്ഥയിൽ

കരമനയിൽ ബൈക്ക് നിയന്ത്രണം വിട്ട് ഫുട്പാത്തിലിടിച്ച് നെയ്യാറ്റിൻകര സ്വദേശികളായ പ്രണവ്, സജിൻ, ഇതര സംസ്ഥാന തൊഴിലാളിയായ റിതിക് എന്നിവരാണ് മരിച്ചത്. പുലർച്ചെ 1.30-ഓടെയായിരുന്നു അപകടം. മരിച്ച മൂവരും ഹോട്ടൽ ജീവനക്കാരാണ്. ഒരേ ബൈക്കിൽ സഞ്ചരിക്കുകയായിരുന്നു ഇവർ. ബൈക്ക് നിയന്ത്രണം വിട്ട് റോഡരികിൽ പാർക്ക് ചെയ്തിരുന്ന ബൈക്കുകളിലും ഫുട്പാത്തിലും ഇടിക്കുകയായിരുന്നുവെന്നാണ് പ്രാഥമിക വിവരം.

കോഴിക്കോട് നല്ലളം മോഡേൺ ബസാറിൽ കാറും പിക്കപ്പ് വാനും കൂട്ടിയിടിച്ച് രാമനാട്ടുകര സ്വദേശികളായ ദിനിൽ, അജീഷ്, വിമൽ എന്നിവരാണ് മരിച്ചത്. പുലർച്ചെ നാല് മണിയോടെയായിരുന്നു അപകടം. ഇടിയുടെ ആഘാതത്തിൽ കാർ പൂർണ്ണമായും തകർന്നു. കാറിലുണ്ടായിരുന്ന ശ്യാംലാൽ, ദിജിൽ എന്നിവർ അതീവ ഗുരുതരാവസ്ഥയിൽ ആശുപത്രിയിൽ ചികിത്സയിലാണ്. പിക്കപ്പ് വാൻ ഡ്രൈവർക്കും അപകടത്തിൽ പരിക്കേറ്റിട്ടുണ്ട്.

advertisement