അരങ്ങിൽ വിസ്മയമായി 'നക്ഷത്രപ്പൊട്ട്': സ്ത്രീധനവിരുദ്ധ സന്ദേശവുമായി കല്ലറയിലെ വനിതകളുടെ നാടകക്കൂട്ടായ്മ

സമൂഹത്തിൽ ആഴത്തിൽ വേരൂന്നിയ സ്ത്രീധനമെന്ന വിപത്തിനെതിരെ വിട്ടുവീഴ്ചയില്ലാത്ത നിലപാടാണ് ഈ നാടകം മുന്നോട്ടുവെക്കുന്നത്. സ്ത്രീകൾ നേരിടുന്ന വിവിധ പ്രശ്നങ്ങളെ അതിൻ്റെ ആഴത്തിലും പരപ്പിലും ഹൃദയസ്പർശിയായി അവതരിപ്പിക്കാൻ കേവലം 35 മിനിറ്റ് ദൈർഘ്യമുള്ള ഈ നാടകത്തിലൂടെ സാധിക്കുന്നുണ്ട്. പ്രമുഖ എഴുത്തുകാരി കിരൺ ബീസുവിൻ്റെ രചനയിൽ പ്രശസ്ത നാടക നടൻ തെങ്ങുംകോട് മോഹനനാണ് ഈ നാടകം സംവിധാനം ചെയ്തിരിക്കുന്നത്. കല്ലറ പഞ്ചായത്തിലെ സാധാരണക്കാരായ പത്തോളം വനിതകളാണ് ഇതിൽ വേഷമിടുന്നത് എന്നത് ഏറെ ശ്രദ്ധേയമാണ്.

advertisement

അഭിനയരംഗത്ത് മുൻപരിചയമില്ലാതിരുന്നിട്ടും പ്രൊഫഷണൽ താരങ്ങളെ വെല്ലുന്ന പ്രകടനമാണ് ഓരോ വേദികളിലും ഇവർ കാഴ്ചവെക്കുന്നത്. പൂർണ്ണമായും വനിതകൾ മാത്രം അണിനിരക്കുന്ന ഈ നാടകം ഗ്രാമീണരായ സ്ത്രീകളുടെ കലാപരമായ കഴിവുകളെ പ്രോത്സാഹിപ്പിക്കാനുള്ള പഞ്ചായത്തിൻ്റെ മാതൃകാപരമായ നീക്കം കൂടിയാണ്. സ്ത്രീ ശാക്തീകരണവും സ്ത്രീധന വിരുദ്ധതയും പ്രമേയമാക്കി കലറയെ സാമൂഹിക മാറ്റത്തിനുള്ള ആയുധമാക്കാമെന്ന് ഈ 'നക്ഷത്രപ്പൊട്ട്' തെളിയിച്ചു കഴിഞ്ഞു.