ശക്തിയുടെ പ്രതീകമായി കരിങ്കാളി ദേവി: മരുതംകുഴിയിലെ പുരാതനമായ ദേവീ സന്നിധി

പുരാതന ദ്രാവിഡ മാതൃദൈവമായ കരിങ്കാളി ശക്തിയുടെയും സംരക്ഷണത്തിൻ്റെയും പ്രതീകമാണ്. വേദഗ്രന്ഥങ്ങളിൽ ഭൈരവി എന്ന് വിശേഷിപ്പിക്കപ്പെടുന്ന ദേവിയുടെ സംസ്കൃത രൂപം 'കൃഷ്ണകാളി' എന്നാണ്. പ്രധാനമായും പരദേവതാ രൂപത്തിൽ ആരാധിക്കപ്പെടുന്ന ഈ ക്ഷേത്രത്തിൽ ചൊവ്വ, വെള്ളി, ഞായർ ദിവസങ്ങളിലാണ് ഭക്തർക്ക് ദർശന സൗകര്യമുള്ളത്.

ഈ ക്ഷേത്രത്തിലെ ഏറ്റവും പ്രധാനപ്പെട്ട അനുഷ്ഠാന വിശേഷമാണ് കരിങ്കാളി കെട്ടൽ. കറുപ്പ്, ചുവപ്പ്, വെളുപ്പ് എന്നീ നിറങ്ങൾ ചേർന്ന വസ്ത്രങ്ങളും കാലിൽ ചിലമ്പും വലതുകൈയ്യിൽ പള്ളിവാളും ഇടതുകൈയ്യിൽ കുരുത്തോല ഗദയുമാണ് കരിങ്കാളി വേഷത്തിൻ്റെ പ്രധാന ആകർഷണം. പിച്ചളയിൽ തീർത്ത കൃത്രിമ മുലകളും കുരുത്തോലകളാൽ അലങ്കരിച്ച കൂർത്ത കിരീടവും ചരടുകൾ കൊണ്ടുള്ള കണ്ണടയും കുരുത്തോല മൂക്കും ചേരുന്ന വേഷം വേറിട്ടൊരു കാഴ്ചയാണ്.

advertisement

കണിശമായ വ്രതാനുഷ്ഠാനങ്ങളോടെ ഒരു പ്രത്യേക വിഭാഗത്തിൽപ്പെട്ടവരാണ് ഈ അനുഷ്ഠാന കലാരൂപം അവതരിപ്പിക്കുന്നത്. ചെണ്ടയുടെ താളത്തിനൊത്ത് വെളിച്ചപ്പെടുന്ന കരിങ്കാളികൾ സാധാരണയായി ക്ഷേത്രത്തിന് പുറത്ത് കുരുത്തോല കൊണ്ട് നിർമ്മിച്ച താൽക്കാലിക മണ്ഡപത്തിലാണ് ചടങ്ങുകൾ പൂർത്തിയാക്കാറുള്ളത്.