കരമനയാറിൻ്റെ തീരത്തെ പുണ്യം; തൃക്കണ്ണപുരം ശ്രീ ചക്രത്തിൽ ശിവക്ഷേത്രം

മുക്കണ്ണനായ മഹാദേവൻ വാണരുളുന്ന ഇടം എന്ന അർത്ഥത്തിലാണ് ഈ പ്രദേശത്തിന് തൃക്കണ്ണപുരം എന്ന പേര് ലഭിച്ചത്. പരമ്പരാഗത കേരളീയ വാസ്തുവിദ്യയിൽ പണിതീർത്ത വട്ടശ്രീകോവിലിൽ കിഴക്കോട്ട് ദർശനമായാണ് ലിംഗരൂപത്തിൽ ഭഗവാൻ കുടികൊള്ളുന്നത്. ശ്രീകോവിലിനുള്ളിൽ തന്നെ ഇടതുവശത്തായി പാർവ്വതി ദേവിയുടെ സാന്നിധ്യവുമുണ്ട്. ഉപദേവന്മാരായി ഗണപതി ഭഗവാനും ശ്രീകോവിലിന് പുറത്ത് നാഗരാജാവും നാഗറാണിയും വാണരുളുന്നു.

ആത്മീയ പൈതൃകത്തിൻ്റെ കേന്ദ്രമായ ഈ ക്ഷേത്രം പിതൃതർപ്പണ ചടങ്ങുകൾക്കും ഏറെ പ്രസിദ്ധമാണ്. ദക്ഷിണവാഹിനിയായ കരമനയാറിൻ്റെ സാമീപ്യം ക്ഷേത്രത്തിന് കാശിയോളം പുണ്യം നൽകുന്നുവെന്നാണ് സങ്കല്പം. അതുകൊണ്ടുതന്നെ കർക്കിടക വാവുബലി ദിനത്തിൽ ആയിരക്കണക്കിന് ഭക്തരാണ് പിതൃക്കളുടെ ആത്മശാന്തിക്കായി തിലഹോമവും തർപ്പണവും നടത്താൻ ഇവിടെ എത്തിച്ചേരുന്നത്. കുംഭമാസത്തിലെ മഹാശിവരാത്രിയും ധനുമാസത്തിലെ തിരുവാതിരയുമാണ് ക്ഷേത്രത്തിലെ പ്രധാന ആഘോഷങ്ങൾ.

advertisement